Ինձ համար մեծ պատիվ է առաջին պաշտոնական այցով գտնվել Վրաստանում, քանի որ մեր քաղաքական օրակարգում Վրաստանի հետ հետագա հարաբերություններին հատուկ տեղ եւ նշանակություն է հատկացված: Այս մասին Վրաստանի վարչապետ Գիորգի Կվիրիկաշվիլիի հետ հանդիպումից հետո կայացած ճեպազրույցի ժամանակ հայտարարել է Հայաստանի վարչապետ Նիկոլ Փաշինյանը:
«Անկախ մեր գործունեությունից՝ մենք միշտ աշխատել ենք հայ-վրացական հարաբերությունների զարգացման ուղղությամբ: Ես ինքս՝ որպես լրագրող, պատգամավոր, իսկ այժմ՝ որպես Հայաստանի վարչապետ, ուժերի ներածին չափով արել եմ ամեն ինչ՝ հայ-վրացական հարաբերությունների զարգացմանը նպաստելու համար: Եվ այժմ մենք այն կետում ենք, երբ հնարավորություն կա իրագործելու եթե ոչ բոլոր ցանկությունները, ապա՝ դրանց մեծ մասը՝ այդ հարաբերությունների զարգացման համար:
Շնորհավորում եմ Վրաստանի վարչապետին Առաջին Հանրապետության հարյուրամյակի կապակցությամբ: Մենք ինքներս օրերս նշեցինք այս օրը: Այս տոները կապված են միմյանց հետ: Հայաստանի առաջին հանրապետության հռչակումը իրականացվել է Թբիլիսիում, եւ այդ փաստը ինքնին վկայում է հայ-վրացական հարաբերությունների խորության մասին, որը մենք պետք է զարգացնենք»,- ասել է Փաշինյանը:
Փաշինյանի խոսքով՝ հայ-վրացական հարաբերություններում առկա դրական մթնոլորտը կուղղվի արդյունավետությանը քաղաքական, տնտեսական եւ այլ ոլորտներում.
«Հուսով եմ, որ ավելի կոնկրետ արդյունքներ կլինեն միջկառավարական հանձնաժողովի աշխատանքից հետո: Մեր երկրները երկարաժամկետ եւ կարճաժամկետ շահեր ունեն, որոնց տեսլականը քննարկվել է հանդիպման ժամանակ: Մենք Վրաստանի հետ շատ համատեղ նախագծեր ունենք, որոնց իրականացման համար մենք կգործադրենք բոլոր ջանքերը եւ կաշխատենք նոր նախագծերի ստեղծման ուղղությամբ: Մենք վստահ ենք, որ հայ-վրացական հարաբերություններում չլուծվող խնդիրներ չկան, քանի որ դրանց լուծման համար կա ամենակարեւորը՝ տրամադրվածությունը: Մենք եկել ենք Վրաստան՝ բոլոր հարցերը բարեկամության եւ եղբայրության մթնոլորտում քննարկելու համար: Համոզված եմ, որ այս տրամադրվածությունը եւ մթնոլորտը կարող են լուրջ զարգացումների հանգեցնել հարաբերություններում»:
ՀՀ Վարչապետը նաեւ նշել է, որ շատ տպավորված էր ապրիլ-մայիս ամիսներին Հայաստանում տեղի ունեցած «թավշյա» ժողովրդավարական հեղափոխության նկատմամբ Վրաստանի կողմից ցուցաբերած ուշադրությամբ եւ հետաքրքրությամբ: « Վրացի լրագրողներն ակտիվություն էին ցուցաբերում այդ միջոցառումների լուսաբանման ընթացքում: Այստեղ ես տեսնում եմ լրագրողների, ովքեր հարազատ են դարձել մեզ համար: Հուսով եմ, որ լրագրողների հետաքրքրությունը չի մարի, եւ նրանք շահագրգռված կլինեն լուսաբանել ոչ միայն քաղաքական, այլեւ տնտեսական իրադարձությունները, եւ այդ հետաքրքրությունը երկկողմանի կլինի»:
Փաշինյանը նաեւ հույս է հայտնել, որ Վրաստանը ամենաբարձր մակարդակով կմասնակցի աշնանը Երեւանում կայանալիք Ֆրանկոֆոնիայի օրեր:
