Թուրքիայի ՆԳ նախարար Սուլեյման Սոյլուն արձագանքել է քրդական «Ժողովուրդների դեմոկրատական» կուսակցության նախկին նախագահ, Թուրքիայի նախագահի թեկնածու Սելահաթին Դեմիրթաշին բանտից ազատելու կոչերին։
Թուրքական T24.com կայքի փոխանցմամբ՝ Թուրքիայի ՆԳ նախարար Սուլեյման Սոյլուն նշել է, թե Սելահաթին Դեմիրթաշը բռնություններ անելու կոչեր է արել եւ դրա համար էլ բանտում է։ «Եթե Դեմիրթաշը բանտում չնստի, ապա ո՞վ նստի»,–ասել է ՆԳ նախարարը։
Նշենք, որ Թուրքիայի քրդական կուսակցության կողմից նախագահի թեկնածու առաջադրված Սելահաթին Դեմիրթաշը գտնվում է կալանքի տակ եւ մեղադրվում է «ահաբեկչական կառույցի անդամ լինելու» եւ «ահաբեկչական կառույցին աջակցելու կամ քարոզչություն անելու» մեղադրանքով։
Սելահաթին Դեմիրթաշի փաստաբանները մի քանի անգամ դիմել են դատարանին՝ պահանջելով փոխել խափանման միջոը եւ թույլ տալ, որ նախագահի թեկնածուն կարողանա նախընտրական քարոզչություն իրականացնել։