Որոշ ավանդատուներ, որոնք վերջին իրադարձությունների ժամանակ հետ էին վերցրել իրենց գումարները, ամբողջությամբ վերադարձրել են դրանք: Այս մասին, այսօր՝ մայիս 30-ին, Կենտրոնական բանկի 2017 թ. Ֆինանսական կայունության հաշվետվությունը ներկայացնելիս ասաց ԿԲ ֆինանսական համակարգի կայունության եւ զարգացման վարչության պետ Անդրանիկ Գրիգորյանը:
Նրա խոսքով, դրանք հիմնականում այն ավանդատուներն էին, որոնք չեն կարողանում երկարաժամկետ որոշումներ կայացնել կամ այն կամ իրադարձությունների արդյունքում, պանիկայի մեջ են ընկնում. «Այն, ինչ հանվել էր, ամբողջությամբ վերադարձվել է համակարգ»,- վստահեցրեց Գրիգորյանը:
Նա ընդգծեց, որ այդ ընթացքում խոշոր գումարների արտահոսք չի ֆիքսվել. «Բացի այն, որ ԿԲ-ում կա ֆինանսական դիտարկումների գործոնը, որը ցանկացած խոշոր ֆինանսական հոսք պարտադիր մինչեւ վերջ հետազոտում է, նաեւ երկիրն է լուրջ ուսումնասիրում, որտեղ գումարը գնում է: Բանկային համակարգի միջոցով չի եղել ֆինանսական խոշոր արտահոսք, որը կապ չի ունեցել բիզնես ստանդարտ գործընթացների հետ»: