Աղետի գոտու բնակավայրերում երկրաշարժի հետեւանքով անօթեւան մնացած ընտանիքների բնակարանային խնդիրների լուծման նպատակով Լոռու մարզի գյուղական բնակավայրերում ծրագրի շահառու ճանաչված 44 ընտանիքի բնակարանային խնդիրների լուծման նկատմամբ ձեւավորված պարտավորությունների կատարումն ապահովելու նպատակով կառավարությունն այսօր՝ հունիսի 1-ին, ընդունել է համապատասխան որոշում:
Հարցը ներկայացնող Քաղաքաշինության պետական կոմիտեի նախագահ Նարեկ Սարգսյանը նշեց, որ 2008 թվականին հաշվառվել է, որ Հայաստանում կա երկրաշարժի հետեւանքով անօթեւան մնացած 5400 ընտանիք, որից 4900-ի խնդիրը լուծվել է այս տարիների ընթացքում. դեռեւս 500 ընտանիքների խնդիր մնում է չլուծված. «Խոսքը Շիրակի, Լոռու եւ Արագածոտնի մարզերի մասին է»:
Վարչապետ Նիկոլ Փաշինյանը նկատեց. «Փաստորեն մեզ մոտ աղետի գոտի հասկացությունը վերացված չէ»:
Գյուղատնտեսության նախարար Արթուր Խաչատրյանն էլ նկատեց, որ ցավոք այդ հաշվարկներում հաշվի չեն առնված Գյումրի քաղաքում ավերված սեփական տները, որոնք մի քանի հարյուրի են հասնում: