ՄԱԿ-ում ԱՄՆ նախկին դեսպան Սամանթա Փաուերը հիասթափություն է ապրել, երբ Օբաման չի ճանաչել Հայոց ցեղասպանությունը: Այս մասին Փաուրեն անձամբ պատմեց հունիսի 8-ին Երեւանում կայացած բանավեճի ժամանակ՝ հավելելով, որ ինքն զգացել է նույնը, ինչ բոլոր ներկաները:
Նրա խոսքով՝ այն, որ Օբաման իր նախագահության տարիներին այդպես էլ չճանաչեց Հայոց ցեղասպանությունը, «շատերի համար անչափ ցավալի էր»: Սակայն, նրա խոսքով, դա լակմուսի թուղթ չէ, եւ ավելի կարեւոր են ջանքերը, որոնք շատերը նախաձեռնել են, որ ճանաչումն ապահովեն:
Խոսելով Թուրքիայի դիրքորոշման մասին՝ նա շեշտեց, որ այս երկրի կառավարությունը երկար տարիներ միլիարդավոր դելարներ է ներդնում եւ որպես ՄԱԿ անդամ լծակներն օգտագործում, որ Ցեղասպանությունը չճանաչվի: «Այնքան ակնհայտ է, որ ցեղասպանություն է գործվել: Սակայն ՆԱՏՕ-ի գործընկերը վախեցնում է եւ շանտաժի ենթարկում»,- նշեց նա՝ հավելելով, որ անչափ ամոթալի է, երբ ԱՄՆ պաշտոնյաները Ցեղասպանության մասին հարցերին տալիս են երկարաշունչ խուսափողական պատասխաններ:
Նրա կարծիքով՝ կա՛մ պետք է կենտրոնանալ ուշադրություն չդարձնելու վրա, կա՛մ այն փաստի վրա, որ ԱՄՆ կառավարությունը շփոթահար խեղաթյուրում է բառերը, «որովհետեւ նրանց շանտաժի են ենթարկում տարբեր կառավարություններ ու կազմակերպություններ, որպեսզի Հայոց ցեղասպանությունը հերքեն»:
«Իրականում այն, ինչը չի բավականացնում, կառավարությանը մարտահրավեր նետելու լծակն է»,- շեշտեց Փաուերը
Նա կարծում է, որ վերապրածների սերունդները, Ցեղասպանության մասին նրանց պատմությունները աշխարհն ավելի լավն են դարձնում:
«Պատմությունը հարգելով՝ դուք աշխարհն ավելի լավն եք դարձնում»,- նշեց Սամանթա Փաուերը՝ հավելելով, որ իր որդին ծնվել է ապրիլի 24-ին, եւ այդ օրը իրենք մոմեր են վառում նրա եւ հայերի համար: