Հայաստանում կատարվեց իշխանափոխություն, եւ այսօր «Արեւելյան գործընկերության» ձեւաչափի բանաձեւը փոխվեց՝ 3+3-ից դառնալով 4+2: Այս մասին, այսօր՝ հունիսի 14-ին, «Արեւելյան գործընկերության ապագան ալեկոծ ժամանակներում» թեմայով միջազգային գիտաժողովի բացման խոսքում նշել է Գլոբալիզացիայի եւ տարածաշրջանային համագործակցության վերլուծական կենտրոնի նախագահ Ստեփան Գրիգորյանը:
Նրա խոսքով, «Արեւելյան գործընկերության» մեջ ընդգրկված 6 երկրներից Վրաստանը, Ուկրաինան, Մոլդովան, Հայաստանը շրջանակային համաձայնագիր ունեն, իսկ Ադրբեջանի եւ Բելառուսի հետ համագործակցություն այլ կերպ է դիտարկվում:
Ստեփան Գրիգորյանը նշեց, որ հայ ժողովուրդն այս իշխանափոխությամբ ասաց, թե ուր է գնում, որտեղ է ուզում լինել. «Այլեւս Հայստանի վրա չի տարածվում տեսակետը, թե ժողովրդավարությունը ոչ բոլորի համար է: Հայ ժողովուրդն ասաց, որ որ մենք ուզում ենք ապրել ժողովրդավարության պայմաններում, չենք ուզում նույն մարդուն 4-5-6 անգամ տեսնել, եւ դա էր պատճառը, որ բանաձեւը դարձավ 4+2, եւ դա պետք է լինի փաստ նաեւ մեր գործընկեր եվրոպացիների համար»,-ասաց Ստեփան Գրիգորյանը:
Նա ընդգծեց, որ շատ կարեւոր են հասարակական կազմակերպությունները որոնք կարող են ստեղծել հարթակներ, որի հետ հաշվի կնստի ԵՄ-ն ու իրենց հետ կաշխատի:
«Այս հեղափոխությունը կմաքրի նաեւ այն կեղտը, որ կա փորձագիտական դաշտում: կային ֆեյքային փորձագետներ, որոնք հեքիաթ էին պատմում եվրոպացի գործընկեներին, թե Հայաստանում ինչ-որ տեռորիստական խմբավորումներ կան: Ամոթ է 60 քաղբանտարկյալ ունենալ եւ դուրս գալ, ասել, որ քաղբանտարկյալներ չկան, դրանք փորձագետներ չեն, ֆեյքային փորձագետներ էին: Այն, որ մարդկանց իրար հետեւից բաց են թողնում, ի պատիվ Նիկոլ Փաշինյանի: Դա շատ կարեւոր է եւ նշանակում է, որ դատավորների վրա ոչ մի ճնշում չկա, եւ ցույց է տալիս, որ կան քաղբանտարկյալներ»: