Արցախի Հանրապետության գյուղատնտեսության նախարարությունը կքննարկի կարկուտի եւ սելավների հետեւանքով տուժած հողօգտագործողներին աջակցություն տրամադրելու հարցը: Նախարար Ժիրայր Միրզոյանն այսօր՝ հունիսի 18-ին աշխատանքային խորհրդակցություն է հրավիրել, որի ընթացքում քննարկվել են վերջին օրերին հանրապետությունում բնական աղետների պատճառած վնասները եւ դրանց բացասական հետեւանքները մեղմացնելու վերաբերյալ հարցեր: Այս մասին տեղեկացնում է ԱՀ գյուղնախարարության մամուլի ծառայությունը:
Խորհրդակցության ընթացքում նախարարության համապատասխան պաշտոնատար անձանց եւ ստորաբաժանումների ղեկավարներին հանձնարարվել է ստեղծել աշխատանքային խմբեր, որոնք հունիսի 19-ից այցելություններ կիրականացնեն շրջաններ (Մարտունի, Քաշաթաղ)՝ աղետից տուժած գյուղատնտեսական նշանակության հողատարածքներն ու վնասվածության աստիճանը ճշտելու նպատակով: Իրականացվելիք աշխատանքներում կներգրավվեն նաև շրջվարչակազմերի գյուղբաժնի ներկայացուցիչներն ու համայնքները սպասարկող գյուղատնտեսները: Ուսումնասիրություններից հետո կքննարկվեն տուժած հողօգտագործողներին աջակցության տրամադրման մեխանիզմներն ու ձեւաչափերը:
Նախարարը անդրադարձել է նաև կառավարության կողմից վերջերս ընդունված՝ Արցախի Հանրապետությունում բուսաբուծության համալիր զարգացման և անասնաբուծությանը ներկայացվող պարտադիր պահանջների վերաբերյալ երկու ռազմավարական նշանակության ծրագրերի դրույթները՝ հողօգտագործողներին ու ֆերմերներին առավել հասանելի եղանակներով հրամցնելու խնդրին, որը նախատեսվում է լուծել տեղերում հանդիպումների, անմիջական շփումների ու սեմինար-խորհրդակցությունների կազմակերման միջոցով: