Ղարաբաղյան հակամարտության երկու կողմերն էլ պետք է նստեն բանակցային սեղանի շուրջ եւ պայմանավորվեն: Այս մասին հունիսի 18-ին Երեւանում կայացած մամուլի ասուլիսին հայտարարել է Եվրոպական խորհրդարանի արտաքին հարաբերությունների հանձնաժողովի նախագահ Դեվիդ Մաքալիսթերը:
Եվրոպական խորհրդարանի պատվիրակության ղեկավարը, ով այցով գտնվում է Հայաստանում, նշել է, որ անհրաժեշտ է պահպանել հրադադարի ռեժիմը եւ դադարեցնել ռազմատենչ հռետորությունը: «Մենք պետք է գտնենք ղարաբաղյան հակամարտության լուծումը: Ես սա ասել եմ, եւ կրկին կրկնում եմ. հակամարտությունը ռազմական լուծում չունի: Ստատուս քվոն անընդունելի է երկու կողմերից տուժող բնակչության համար», - ասել է Մաքալիսթերը:
Պատասխանելով շփման գծում ադրբեջանական զորքերի մոբիլիզացման եւ հակամարտության սրման վտանգի մասին վերջին հաղորդումների վերաբերյալ հարցին՝ ԵՄ պատվիրակության անդամ Սաջադ Քարիմը նշել է, որ նման տեղեկությունները մտահոգիչ են: «Եվրամիությունը կոչ է անում կողմերին վերջնական համաձայնության գալ եւ, մասնավորապես, խուսափել այն ամենից, ինչը կարող է վնասել պոտենցիալ նոր հնարավորություններին՝ հաշվի առնելով փոփոխվող հանգամանքները»,- հավելել է նա: