Չեմ ցանկանում խախտել որևէ մեկի անմեղության կանխավարկածը, բայց այս դեպքում խոսքը անմեղության կանխավարկածը խախտելու մասին չէ, մենք գործ ունենք սովորական դիակապտության հետ: Այս մասին, այսօր՝ հունիսի 19-ին, ԱԺ արտահերթ նիստում ԱԺ պատգամավոր Մանվել Գրիգորյանին անձեռնմխելիությունից զրկելու հարցի քննարկման ժամանակ հայտարարեց «Ծառուկյան» խմբակցության պատգամավոր Նաիրա Զոհրաբյանը:
Նրա խոսքով, Արցախի բարձրագույն պարգեւ ստացած անձը, շարքային գող է, որ կարող է գողանալ զինվորի հացը. «ՀՀԿ-ի պատգամավորների կողմից ցուցադրական դահլիճը լքելու նշանակում է, հատկապես կանաց դեպքում, որոնք մայր են, պիտի որ ցավ զգային, որ զինվորի հացը գողանում է իրենց խմբակցության անդամը, խոսում է այն մասին, որ այս կանայք կրում են նման դիակապտության քաղաքական պատասխանատվությունը»,-ընդգծեց Նաիրա Զոհրաբյանը:
Նա նշեց, որ սա երկար տարիներ շարունակվել է, երբ մեկ անձ կարող էր իր ֆեոդալական կարգերը հաստատել մի ռեգիոնում, այն սարքելով իրեն պատանդ, իսկ բնակիչներին՝ իր ճորտը: «Ես կարող եմ տարակուսել, որ իրավապահ համակարգը չի իմացել, որ առաջնագծի համար նախատեսված շտապօգնության մեքենան կարող է հայտնվել Մանվել Գրիգորյանի առանձնատանը: Մանվել Գրիգորյանը պատասխան պետք է տա ապրիլյան պատերազմում զոհված զինվորների ծնողների առջեւ, դա միանշանակ է, որովհետեւ այն զինվորները, որոնք փամփուշտ չունեին, դրա մեղավորը նաեւ այստեղ օրեր առաջ նստած Արցախի այսպես կոչված հերոսն է: Մենք հասնակում ենք, որ Մանվել Գրիգորյանը մենակ չէ, մեր երկրում բազմաթիվ մանվել գրիգորյաններ կան, նրանցից յուրաքանչյուրը պետք է պատասխան տա»:
Նաիրա Զոհրաբյանը հայտեց, որ րեկ խոսել է Ախուրյանի դպրոցներից մեկի անձնակազմի հետ. «Այդ դպրոցի ուղարկած արկղը դուք տեսաք Մանվել Գրիգորյանի առանձնատանը: Այդ մարդիկ ասում էին, որ զինվորների համար սնունդն ապառիկով վերցրել են խանութներից: Երրորդ դասարանի երեխան հպարտ ու հուզված էր, որ իր քաղցրավենիքը հասել է զինվորին, բայց մենք տեսանք, որ երեխաների այդ հոգու նվերը հասել էր Մանվել Գրիգորյանի գազաններին:
Մենք սամասուդի կոչ չենք անում, բայց հիմա նալն էլ, մուրճն էլ մեխն էլ օրենքի ձեռքում է եւ ակնկալում ենք, որ Մանվել Գրիգորյանը եւ բոլոր մանվել գրիգորյանները իրենց պատիժը կստանան:
Սպա Մանվել Գրիգորյանը մի տարբերակ ունի իր բարի համբավը վերականգնելու համար, եթե այդքան քաջություն ունենա: Կարծում եմ՝ հասկացաք՝ ինչ նկատի ունեցա»,-իր խոսքն ամփոփեց պատգամավորը:
Նշենք, որ ԱԺ-ում այս պահին քննարկվում է ԱԺ պատգամավոր Մանվել Գրիգորյանի նկատմամբ քրեական հետախպնդում իրականացնելու եւ նրան կալանավորելու համար ԱԺ համաձայնությունն ստանալու համար գլխավոր դատախազի միջնորդությունը:
Ավելի վաղ NEWS.am-ը հայտնել էր, որ Մանվել Գրիգորյանը ձերբակալվել է հունիսի 16-ին՝ Ազգային անվտանգության ծառայության խուզարկություններից հետո ապօրինի կերպով զենք եւ ռազմամթերք պահելու համար: Ազգային անվտանգության ծառայության երեկ տարածած տեսանյութի համաձայն, Հանրապետական պատգամավոր, գեներալ Մանվել Գրիգորյանի տանն ու նրան պատկանող տարածքներում հայտնաբերվել են մեծ քանակությամբ ռազմամթերք ու թանկարժեք մեքենաների հավաքածուներ, ինչպես նաեւ երկու տարի առաջ՝ ապրիլյան պատերազմի ժամանակ, բանակին որպես օգնություն ուղարկված շտապօգնության մեքենա, սնունդ, հագուստ ու այլ իրեր:
