Էկվադորի ԱԳ նոր նախարար Խոսե Վալենսիան հայտարարել է, որ WikiLeaks կայքի հիմնադիր Ջուլիան Ասանժի համար ապաստարանը չի կարող հավերժական լինել, փոխանցում է «ՌԻԱ Նովոստի»-ն:
2012 թվականից Ասանժը Լոնդոնում Էկվադորի դեսպանատանն է գտնվում: Նա դիմել էր Էկվադորի իշխանություններին քաղաքական ապաստան տրամադրելու խնդրանքով՝ WikiLeaks-ում իր գործունեության հետ կապված ԱՄՆ-ում Շվեդիայի իշխանություններին արտահանձնելու մտավախության պատճառով:
«Այո, Էկվադորը փնտրում է այս խնդրի լուծումը, որովհետեւ սկզբունքորեն ապաստարանը չի կարող հավերժական լինել, չի կարելի մտածել, որ այն կարող է տարիներ տեւել, ու չի գա որոշակի պահ, երբ այդ իրավիճակը կվերանայվի: Այդ թվում՝ նաեւ այն պատճառով, որ դա հակասում է իր փախստականի իրավունքներին»,- Ecuavisa-ի եթերում հայտարարել է Վալենսիան:
Այս տարվա մարտի վերջին Էկվադորի կառավարությունը Ասանժին զրկել էր արտաքին աշխարհի հետ կապից: Էկվադորի իշխանությունների կարծիքով՝ Ասանժի պահվածքը եւ համացանցում հրապարակած հաղորդագրությունները սպառնալիքի տակ են դնում Մեծ Բրիտանիայի, ԵՄ երկրների եւ աշխարհի այլ պետությունների հետ երկրի լավ հարաբերությունները:
Էկվադորի նախագահ Լենին Մորենոն մայիսին կարգադրել էր չեղարկել Լոնդոնում երկրի դեսպանատանը անվտանգության ապահովման բոլոր լրացուցիչ միջոցառումները, որտեղ թաքնված է Ասանժը: