Մանվել Գրիգորյանի կինը՝ Նազիկ Ամիրյանը ձերբակալվել է: Ձերբակալության որոշումը մի քանի օր առաջ է կայացվել, սակայն ոստիկանությունը չէր կարողանում հայտնաբերել նրան: Հատուկ քննչական ծառայության տեղեկացմամբ՝ Ամիրյանն անձամբ է ներկայացել նախաքննական մարմին: Նրան կասկածում են անհայտ աղբյուրից մեծ քանակությամբ զենք եւ ռազմամթերք ձեռք բերելու եւ Մանվել Գրիգորյանի հետ իրենց առանձնատներում ապօրինի կերպով պահելու մեջ:
Երեւանի ավագանու «Ելք» խմբակցության ղեկավարը հայտարարել է քաղաքապետ Տարոն Մարգարյանի հրաժարականի մասին: Դավիթ Խաժակյանի պնդմամբ՝ Մարգարյանն արդեն գրել է դիմումը, որը, սակայն, դեռ չի հրապարակվել, քանի որ մի քանի հարցեր պարզաբանման կարիք ունեն: Հիշեցնենք, որ Երեւանի ավագանու նախօրեի նիստին Տարոն Մարգարյանը ներկա չէր: Փոխքաղաքապետ Կամո Արեյանն ասաց, որ առողջական խնդիրներ ունի, սակայն Դավիթ Խաժակյանը Մարգարյանի բացակայությունը կապում է հրաժարականի որոշման հետ: Իսկ քաղաքապետարանում չեն հաստատում այս լուրը: Լրատվության վարչության պետն ասում է՝ նման տեղեկություն չունի:
Հայոց ցեղասպանության թանգարան-ինստիտուտի շուրջ սկանդալ է հասունացել: Հայկ Դեմոյանն այսօր ֆեյսբուքյան գրառմամբ կրթության նախարարին մեղադրել է իր բացակայության ժամանակ իր աշխատասենյակ ներխուժելու մեջ: Ըստ Դեմոյանի՝ Արայիկ Հարությունյանն իր տեղակալի հետ նույնիսկ խորհրդակցություն է հրավիրել եւ հայտարարել, որ Դեմոյանի մուտքն այլեւս արգելված է թանգարան: «Չթուլանաք հանկարծ ու մի՛ հաբռգեք, ձեզ պարացնելու ենք»,- սոցցանցում գրել է Հայկ Դեմոյանը: Նա նաեւ խոստացել է նախարարի եւ փոխնախարարի վերաբերյալ ուշագրավ բացահայտումներ անել:
Մեղադրանքներին ի պատասխան՝ Արայիկ Հարությունյանը լրագրողների հետ զրույցում ընդգծել է, որ Դեմոյանի ասածն իրականությանը չի համապատասխանում, իսկ հիմնադրամ դառնալուց հետո թանգարան-ինստիտուտի տնօրենն այլեւս Հայկ Դեմոյանը չէ: Նախարարն ասում է՝ Դեմոյանը Ցեղասպանության ինստիտուտի ժամանակավոր պաշտոնակատարին ստիպել է ազատման դիմում գրել, իսկ ինքն եկել ու «բազմել» է տնօրենի սենյակում: Հարությունյանը Դեմոյանին լրջանալու եւ սթափվելու կոչ է արել՝ նշելով, որ նախարարությունը պատրաստվում է ոստիկանություն դիմել:
Կրկին Հայաստան է այցելել ամերիկահայ հայտնի գործարար, Reddit կայքի համահիմնադիր Ալեքսիս Օհանյանը: Instagram-ի իր էջում Օհանյանն օրվա ընթացքում լուսանկարներ է հրապարակել Հայաստանի տարբեր վայրերից: Ընդամենը մեկ օրով եկած Օհանյանը հասցրել է նաեւ հանդիպել վարչապետ Նիկոլ Փաշինյանին: Ալեքսիսն ասել է՝ երբեք այսքան հպարտ չի եղել, որ հայ է, ապա ընդգծել, որ ուրախ կլինի նպաստել Հայաստանում տեղեկատվական տեխնոլոգիաների զարգացմանը:
Ադրբեջանական Լենքորանում 4.4 մագնիտուդով երկրաշարժ է տեղի ունեցել. ուժգնությունն էպիկենտրոնում կազմել է 6 բալ: Ստորգետնյա ցնցումները թույլ, բայց զգացվել են նաեւ Արցախում: Հադրութում երկրաշարժը զգացվել է 2-3, մայրաքաղաք Ստեփանակերտում՝ 2 բալ ուժգնությամբ:
Հունիսի 29-ից Երեւանում օդի ջերմաստիճանը կբարձրանա մինչեւ 40 աստիճան: Նույնպիսի ջերմաստիճան կդիտարկվի նաեւ Արարատյան դաշտում եւ Սյունիքի հովիտներում: Հայհիդրոմետկենտրոնի օդերևութաբանական կանխատեսումների բաժնի ղեկավարն ասում է՝ ջերմաստիճանային այս ֆոնը պայմանավորված է Իրանի տարածքից եկող օդի տաք հոսքերով: Այն կպահպանվի մինչեւ հուլիսի 2-ը: Իսկ հուլիսին եւ օգոստոսին, ի տարբերություն անցյալ տարվա, անդադար անոմալ տաք եղանակ չի լինի:
Գագիկ Սուրենյանը նաեւ զգուշացրել է հրդեհի մեծ վտանգի մասին: Նա բնակչությանը կոչ է արել զգոն լինել, որպեսզի անցյալ տարվա անտառային հրդեհների իրավիճակը չկրկնվի: Շոգից «փրկվելու» համար էլ մի քանի խորհուրդ ունեն առողջապահության նախարարության մասնագետները:
Հունիսի 27-ին դոլարն ու եվրոն շարունակել են արժեզրկվել: Դոլարի փոխարժեքը կազմել է 482 դրամ, եվրոյինը՝ 561, ռուբլունը՝ 7 դրամ 62 լումա, ֆունտինը՝ 637 դրամ:
Հունիսի 28-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն լինի: Մայրաքաղաքում գիշերը կդիտվի +22+24, ցերեկը՝ +37+39 աստիճան տաքություն: