Արցախի Հադրութի շրջանում, հնարավոր է, գայլերին սպանելու քաղաքականությունը երկու երեխաների մահից հետո վերանայեն:
Հադրութի շրջանային մարմնի աշխատակազմի ղեկավար Վարդան Գասպարյանը NEWS.am-ի թղթակցի հետ հեռախոսազրույցում ասաց, որ տեղի ունեցած ողբերգությունից հետո տեղացիների կողմից մի քանի գայլեր են սպանվել, սակայն հայտնի չէ՝ նրանց թվում կար արդյոք երեխաների մահվան մեղավորը:
«Վերջին տարիներին գայլերին ոչնչացնելու մոինիթորինգ էր հայտարարվել, սակայն տեղի ունեցածից հետո կատաղության համաճարակից խուսափելու նպատակով մի քանի գայլ ոչնչացվել է եւ ապագայում քաղաքականությունը կարող է վերանայվել», - ասաց Գասպարյանը՝ հավելելով, որ հարձակման բոլոր դեպքերը տեղի են ունեցել գյուղի մերձակայքում:
Մայիսի 28-ի ցերեկը Հադրութի շրջանի Մեծ Թաղեր եւ Թումի շրջաններում գայլերը հարձակվել էին մարդկանց վրա:
Մեծ Թաղեր գյուղում գայլը հարձակվել էր Տիգրան Խամփերյանի վրա (2008 թ. ծնված)՝ վնասելով ազդրը եւ Արինա Մարգարյանի (2014 թ. ծնված)՝ վնասեկով երեխայի դեմքը եւ գլուխը: Թումի գյուղում գայլը հարձակվել էր Կամո Գասպարյանի վրա (2007 թ. ծնված)՝ դեմքի եւ ոտքերի վնասվածքներ հասցնելով: Նույն օրը երեկոյան հիվանդանոց էր դիմել Թումի գյուղի բնակիչ Լեւա Արզումանյանը (1977 թ. ծնված), որի ոտքը գայլը կծել էր:
Չնայած բժիշկների բոլոր ջանքերին Կամո Գասպարյանին եւ Արինա Մարգարյանին չհաջողվեց փրկել:
