Իսրայելը ուրբաթ օրը բոյկոտել է ՄԱԿ մարդու իրավունքների հարցերով խորհրդի կողմից Համընդհանուր պարբերական դիտարկման զեկույցի ընդունումը, փոխանցում է «ՌԻԱ Նովոստի»–ն։
«Իսրայելը ինձ հաղորդել է, որ ներկա չի լինի Համընդհանուր պարբերական դիտարկման ամփոփիչ հայտարարության ընդունմանը»,–նիստի մեկնարկին հաղորդել է Խորհրդի նախագահ Վոիսլավ Շուցը։
Համընդհանուր պարբերական դիտարկումը համարվում է ՄԱԿ մարդու իրավունքների հարցերով խորհրդի մեխանիզմ, որի շրջանակներում տարեկան 4 անգամ անցկացվում են մարդու իրավունքների ոլորտում ՄԱԿ անդամ 193 երկրների կողմից պարտականությունների ու պարտավորությունների կատարման կանոնավոր դիտարկումներ։
Իր՝Համընդհանուր պարբերական դիտարկման զեկույցը Իսրայելը ներկայացրել է այս տարվա հունվարի վերջին։ Սա երկրում մարդու իրավունքների հարցով 2013 թվականի դիտարկումից հետո առաջին դիտարկումն էր։ Այն ժամանակ հատուկ ստեղծված աշխատանքային խումբը իրականացրեց բոլոր ներկայացված փաստաթղթերի վերլուծություն:
Փաստաթուղթը քննարկելիս մի շարք պետություններ կրկին կոչ են արել Իսրայելին հարգել մարդու իրավունքների եւ հումանիտար պարտականություններն օկուպացված պաղեստինյան տարածքներում: Միաժամանակ, երկրները ողջունել են այն, որ Թել Ավիվը համագործակցել է խորհրդի հետ Համընդհանուր պարբերական դիտարկման ժամանակ։
