Թել Ավիվի շրջանային դատարանը Աշքելոն քաղաքից 18-ամյա հաքերին մեղավոր է ճանաչել հեռախոսային ահաբեկչության, խարդախության, ռեկետի եւ կեղծ արտասահմանյան անձնագրերի եւ վարորդական վկայականների պատրաստման համար, հաղորդում է «ՌԻԱ Նովոստին»:
«Նա դրանով միլիոններ է աշխատել, հիմա մենք փորձում ենք պարզել, թե ով է նրան վճարել եւ ինչ ծառայությունների համար», - ասում են գործը քննող ոստիկանները: Քննության տվյալներով, երիտասարդը պարբերաբար զանգահարել է ոստիկանություն` Իսրայելում եւ արտերկրում, եւ իրավապահ մարմիններին հայտնել է նախատեսվող պայթյունների եւ տեղադրված ռումբերի մասին:
Նշվում է, որ այդ սպառնալիքների պատճառով ինքնաթիռների չվացուցակում խափանումներ են տեղի ունեցել, ավիաընկերություններին բազմամիլիոն վնասներ են հասցվել:
Լրատվամիջոցների տվյալներով, ոստիկանությունը լրացուցիչ նյութեր է պատրաստում, որպեսզի դատարանը կարողանա մեղադրական եզրակացությունում որոշել պատժի չափը:
