Եվրոպական խորհրդարանում քվեարկությունը եւս մեկ կարեւոր քայլ է Հայաստանի եւ Եվրոպական Միության միջեւ համապարփակ եւ ընդլայնված գործընկերության համաձայնագրի լիարժեք վավերացման համար: Այս մասին Twitter-ի իր միկրոբլոգում գրել է Հայաստանի արտգործնախարար Զոհրաբ Մնացականյանը: «Շնորհակալություն այն յոթ երկրներին, որոնք արդեն վավերացրել են պայմանագիրը: Հույս ունենք լավ լուրեր լսել նաեւ մյուս խորհրդարաններից: Համաձայնագիրը նախնական ուժի մեջ է մտել հունիսի 1-ին», - գրել է Մնացականյանը:

Հիշեցնենք, որ Եվրախորհրդարանը հուլիսի 4-ին լիագումար նստաշրջանի ընթացքում քվեարկությամբ հավանություն է տվել Հայաստանի եւ Եվրամիության միջեւ Համապարփակ եւ ընդլայնված գործընկերության համաձայնագրին: Եվրախորհրդարանի պատգամավորները համաձայնագրին կողմ են քվեարկել 573 «կողմ», 50 «դեմ», 45 ձեռնպահ ձայներով:

Բանաձեւում, որը համաձայնագրի հետ հավանություն է ստացել 598 «կողմ» եւ 52 «դեմ» ձայներով, նշված է, որ գործընկերության մասին նոր համաձայնագիրը ԵՄ-ի եւ Հայաստանի համագործակցության իմաստով վերջնակետը չէ, սակայն ներքին բարեփոխումներին ե դրանց իրականացմանն օժանդակելու գործիք է: