Ազգային անվտանգության ծառայությունն այսօր գործողություններ էր իրականացնում Սերժ Սարգսյանի եղբոր` Ալեքսանդր Սարգսյանի տանը: Շուրջ 8 ժամ տեւած հատուկ գործողություններից հետո ԱԱԾ աշխատակիցները հեռացել են Ալեքսանդր Սարգսյանի եւ նրա որդու՝ Հայկ Սարգսյանի հետ միասին: Ծառայությունից դեռ չեն հայտնում՝ ի՞նչ են հայտնաբերել Երեւանի Թումանյան փողոցում գտնվող Սարգսյանների տանը: Լրագրողները ֆիքսել են միայն, որ ԱԱԾ-ականներն իրենց հետ կտավ, երկու հրացան եւ մի քանի փաթեթ են տարել:
Հունիսի 25-ին էլ ոստիկանությունն ապօրինի զենք պահելու կասկածանքով բերման էր ենթարկել Ալեքսանդր Սարգսյանին, իսկ հետո ազատ արձակել: Վալերի Օսիպյանի խոսքով՝ պարզվել է, որ նրա մոտ եղած զենքն օրինական է: Հայաստանի երրորդ նախագահի ընտանիքի անդամների տներում եւ ընկերությունների գրասենյակներում անցկացվող խուզարկություններում արդարադատության նախկին նախարար Դավիթ Հարությունյանը որոշակի միտում է տեսնում:
Ավանդական հինգշաբթիի փոխարեն կառավարության հերթական նիստն այսօր է անցկացվել. հուլիսի 5-ին հանրապետությունում ոչ աշխատանքային է՝ Սահմանադրության օրն է: Կառավարության անդամների համար նախատեսված համակարգիչներն այսօր փոխվել էին. նրանք այսուհետ կօգտվեն հայկական արտադրության համակարգիչներից: Նիկոլ Փաշինյանն ասում է՝ սա քաղաքական մոտեցում է. բարձր տեխնոլոգիաների զարգացումը որպես առաջնահերթություն որդեգրած կառավարությունը որոշել է խթանել հայկական արտադրողին:
Կառավարության այսօրվա կարեւոր որոշումներից էր, թերեւս, Զինծառայության մասին օրենքում կատարված փոփոխությունը. զինծառայության ընթացքում զոհված ծնող, եղբայր կամ քույր ունեցող ընտանիքի միակ արու զավակն այսուհետ կազատվի ծառայությունից:
Արթուր Վանյանից լրագրողները հետաքրքրվել են մամուլում հրապարակված տեղեկություններից այն մասին, որ նախկին ոստիկանապետ Վլադիմիր Գասպարյանը երեկ ԱԱԾ է հրավիրվել եւ մի քանի ժամ անցկացրել այնտեղ:
Ինչ վերաբերում է պաշտպանության նախկին նախարար Միքայել Հարությունյանին, որին երեկ մեղադրանք առաջադրվեց Մարտի 1-ի քրեական գործով. Արթուր Վանյանը չհերքեց լուրը, որ Հարությունյանը հանրապետությունում չէ, բայց վստահեցրեց, որ ԱԱԾ-ն տիրապետում է իրավիճակին:
Գործի շրջանակում ծանուցագիր է ուղարկվել եւ քննչական ծառայություն է հրավիրվել նաեւ Հայաստանի երկրորդ նախագահ Ռոբերտ Քոչարյանը: Լրագրողները հետաքրքրվել են՝ ի՞նչ կարգավիճակով:
Եվրախորհրդարանը հավանություն է տվել Հայաստան-Եվրամիություն Համապարփակ եւ ընդլայնված գործընկերության մասին համաձայնագրին: Փաստաթղթին կողմ է քվեարկել Եվրախորհրդարանի 573 պատգամավորները, դեմ՝ 50-ը, եւս 45 պատգամավոր ձեռնպահ է քվեարկել: Բանաձեւում նշվում է, որ նոր համաձայնագիրը Եվրամիության եւ Հայաստանի համագործակցության իմաստով վերջնակետը չէ, այլ ներքին բարեփոխումներին եւ դրանց իրականացմանն օժանդակելու գործիք է: Նշենք, որ Համաձայնագիրն արդեն վավերացրել են Եվրամիության անդամ Լատվիան, Լիտվան, Էստոնիան, Լյուսքսեմբուրգը, Ռումինիան եւ Լեհաստանը:
14-ամյա Հայկին նորից նկատել են Երեւանում: Հուլիսի 4-ին ԱԻՆ-ն ահազանգ է ստացել, որ տղային տեսել են Ռոստովյան եւ Գարեգին Նժդեհի փողոցների խաչմերուկի մոտակայքում: Փրկարարները, սակայն, այդպես էլ չեն գտել երեխային: Նշենք, որ Հայկ Հարությունյանն աուտիզմ ունի: Նա տանից դուրս է եկել հունիսի 8-ին, իսկ 10 օր անց՝ հունիսի 18-ին, սպանության հատկանիշներով քրեական գործ է հարուցվել:
Հուլիսի 4-ին դոլարը փոքր-ինչ եւս արժեւորվել է, իսկ եվրոն՝ էժանացել: Դոլարի փոխարժեքը կազմել է 482 դրամ, եվրոյինը՝ 561, ռուբլունը՝ 7 դրամ 63 լումա, ֆունտինը՝ 637 դրամ:
Հուլիսի 5-6-ը հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Ուլրամանուշակագույն ճառագայթման ինդեքսը՝ 7: Երեւանում նույնպես վաղը տեղումներ չեն լինի: Մայրաքաղաքում գիշերը կդիտվի +24+26, ցերեկը՝ +39+41 աստիճան տաքություն:
