Մինչ ԱՄՆ նախագահ Դոնալդ Թրամփը պատրաստվում է իր երկրորդ գագաթնաժողովին, հարկ է հաշվի առնել նախորդ անգամվա սխալները: Այս մասին գրում է Washington Post-ի հեղինակներից վերլուծաբան Ջորջ Ուիլը: Ըստ հոդվածագրի՝ եթե հուլիսի 16-ին ՌԴ նախագահ Վլադիմիր Պուտինի հետ Ֆինլանդիայում հանդիպումը նույն կերպ ընթանա, ինչ Կիմ Չեն Ընի հետ հանդիպումը Սինգապուրում, ապա հետեւանքներն աղետաբեր կարող են լինել:
Ամերիկյան բիզնես ինստիտուտի փորձագետ Նիկոլաս Էբերշտադն էլ «National Interesti»-ի իր հոդվածում գրում է, որ այդ մեկօրյա հանդիպումն ԱՄՆ-ի համար «չպարտադրված սխալների համաշխարհային շարան էր»: Ըստ նրա՝ արդյունքը Հյուսիսային Կորեայի համար համատեղ կնքված պաշտոնական համաձայնագիրն էր, որը կարծես Հյուսիսային Կորեայի ԱԳՆ-ի կողմից գրված փաստաթուղթ լիներ:
Էբերշտադի խոսքով՝ Կիմը պետական հանցախմբի ղեկավար է, որին ՄԱԿ-ի հետախուզական հանձնաժողովը ցանկանում է դատապարտել մարդկության դեմ կատարած հանցագործությունների համար: Մինչդեռ Ամերիկայի նախագահը Կիմին ողողում է հաճոյախոսություններով, նրան անվանում տաղանդավոր մարդ, հաջող բանակցող եւ վստահելի գործընկեր:
Նա գրում է, որ Կորեական թերակղզու վերամիավորումը Կիմի համար անքննելի նպատակ է, որին հասնելու համար անհրաժեշտ է Հարավային Կորեայի պետոականության վերացում:
Այս նպատակին կարելի էր հասնել սահմանափակ միջուկային զենքի միջոցով, ուստի նման մեծածավալ ռազմարդյունահանումն ուղղված է հենց ԱՄՆ-ի դեմ: Սինգապուրի հանդիպումը, Էբերշտադի խոսքով, Հյուսիսային Կորեայի համար վերջին 70 տարվա մեջ լավագույն դիվանագիտական ձեռքբերումն էր, մինչդեռ ԱՄՆ-ն հրաժարվեց իր ռազմական պատրաստականությունից՝ փոխարենը ձեռք չբերելով ո՛չ միջուկային զենքի, ո՛չ էլ հրթիռների արտադրման եւ օգտագործման դադարեցում: Այսքանից հետո դժվար է պատկերացնել Հյուսիսային Կորեայի ապամիջուկայնացում եւ ԱՄՆ-ի կողմից պատժամիջոցների կիրառման շարունակություն:
Հեղինակի խոսքով՝ Թրամփի կառավարման ամենավտանգավոր պահը կգա այն ժամանակ, երբ նա կգիտակցի իր թուլությունն ու վիրավորված փառասիրությամբ չմտածված քայլեր կանի: Մինչդեռ Ռուսաստանի նախագահը, որը շարունակում է եվրոպական ամենամեծ պետության՝ Ուկրաինայի հետ հակամարտությունը, արդեն զգում է թուլությունը, որը բացահայտեց հենց Սինգապուրում տեղի ունեցած հանդիպումը: