Ռուսաստանի մայրաքաղաք Մոսկվայում քրեական գործ է հարուցվել մի ադրբեջանցու դեմ, ով կասկածվում է մաքսավորին կաշառք տալու եւ Չերկիզովյան շուկայից իրեղեն ապացույց համարվող ապրանք գողանալու փորձի մեջ: Այս մասին հունվարի 27-ին հայտնել են ՌԴ հետաքննչական կոմիտեից:
Հետաքննության տվյալներով, 2011-ի հունվարին Մերձմոսկվայում բնակվող ադրբեջանցի Արթուր Քոչարովը եւ նրա հանցակիցները, որոնց ինքնությունը դեռ պարզված չէ, որոշել են գողանալ հագուստը, որը առգրավվել էր քրեական գործի հետաքննության շրջանակում եւ համարվում է իրեղեն ապացույց: Հագուստը գտնվում էր Մոսկվայի պահեստներից մեկում:
Հարուցվել է քրեական գործ «կաշառատվություն», «գողության փորձ» հոդվածներով: Այս հոդվածներով առավելագույն պատիժը 8 տարի ազատազրկում է:
Չերկիզովյան շուկան Մոսկվայի իշխանությունների կողմից փակվել է 2009-ի հունիսին, քանի որ համարվել է, որ այդտեղ պահվող ապրանքները չեն համապատասխանում սպառողների կյանքի եւ առողջության անվտանգության պահանջներին:
