Ճապոնիայի կառավարության տվյալներով՝ երկրի հարավարեւմտյան եւ կենտրոնական շրջաններում ջրհեղեղի հետեւանքով զոհվել է 176 մարդ, 3-ը՝ կրիտիկական վիճակում են, 9-ը համարվում է անհետ կորած, փոխանցում է «ՌԻԱ Նովոստի»-ն:
«Աղետի վայրում հիմա աշխատում են ինքնապաշտպանության, ոստիկանության եւ հրշեջ պահպանության 75 հազար աշխատակիցներ, 83 ուղղաթիռ: Ըստ կանխատեսումների՝ տուժած շրջաններում հնարավոր է կարճատեւ ամպրոպ, սակայն եթե անգամ անձրեւ չի գալիս, անհրաժեշտ է մեծ զգուշություն պահպանել, քանի որ դեռեւս մեծ է սողանքների վտանգը»,- ասել է Ճապոնիայի կառավարության գլխավոր քարտուղար Յոսիհիդե Սուգան՝ Տոկիոյում կայացած մամուլի ասուլիսում:
Մինչդեռ NHK հեռուստաալիքի տեղեկություններով՝ զոհերի թիվը հասնում է 162-ի, իսկ նրանք, ում գտնվելու վայրը դեռեւս չի հաջողվել պարզել, 56-ն են:
Տուժած շրջաններում խանութները չեն գործում: Բացվել են հումանիտար օգնության բաժանման կետեր: Կատարվում է նաեւ կամավորների ընդունում: Հիմա առանց ջրի են մնացել 255 հազար տնային տնտեսություններ: 35 աստիճան շոգի պայմաններում սա ամենամեծ խնդիրներից մեկն է: