Հայաստանում գիտության եւ ժամանակակից տեխնոլոգիաների զարգացման համար անհրաժեշտ է շեշտը դնել կրթության եւ հիմնարար գիտության զարգացման վրա: Այս մասին CANDLE սինքրոտրոնային հետազոտությունների ինստիտուտ այցելության ժամանակ հայտարարեց Հայաստանի նախագահ Արմեն Սարգսյանը:
Նրա խոսքով՝ երեխային դպրոցում կամ անգամ մանկապարտեզում գիտության, տեխնոլոգիաների հանդեպ սեր եւ հարգանք կներշնչեն, ապագայում դրանք կդառնան այդ երեխայի կյանքի անբաժանելի մասը:
Ինչ վերաբերում է հիմնարար գիտությանը, նախագահի խոսքով՝ առանց դրա գիտության եւ ժամանակակից տեխնոլոգիաների զարգացումն անհնար է: ՏՏ ոլորտում, օրինակ, Հայաստանը չի կարող մրցակցել մեծ գերտերությունների հետ, ինչպիսին է Չինաստանը. նրանք չափից ավելի մեծ թվով այտիշնիկներ ունեն: Ուստի Հայաստանը պետք է շեշտը դնի որակի վրա, պետք է պատրաստի գիտնական մաթեմատիկոսների, ֆիզիկոսների, քիմիկոսների, որոնք կկարողանան ինչ-որ նոր բան ստեղծել, ինչը ոչ մի տեղ չկա:
Նախագահը նաեւ նշեց, որ Հայաստանին ԽՍՀՄ-ից «ժառանգություն» մնացած շատ գիտական կենտրոններ վաղուց արդիականությունը կորցրել են կամ փակվել, իսկ CANDLE սինքրոտրոնային հետազոտությունների ինստիտուտը ստեղծվել է արդեն անկախ Հայաստանում, եւ այսօր աշխարհում ծանրակշիռ հեղինակություն ունի: Այս կենտրոնում զբաղվում են ոչ միայն հետազոտություններով, այլեւ արտադրում են դետալներ եւ գործիքներ, որոնք աշխարհում մեծ արժեք ունեն:
Խոսելով Հայաստանում գիտության ֆինանսավորման հետ կապված խնդիրների մասին՝ Արմեն Սարգսյանը նշեց, որ բյուջեի տեղաբաշխմամբ կառավարությունն է զբաղվում, իսկ ինքն անձամբ պատրաստ է իր հնարավորությունների սահմաններում կառավարությանը օգնել:
Այսօր՝ հուլիսի 18-ին, CANDLE գիտահետազոտական ինստիտուտն առաջին անգամ իր դռներն է բացել լայն հանրության առջեւ: Նախագահը եւ այլ հյուրեր այցելել են ռադիոֆիզիկայի, լազերային տեխնիկայի, մագնիսական չափումների, ճշգրիտ չափումների, եռակցման, նորագույն նյութերի եւ միկրոսարքերի, փորձարարական կենսաբանության եւ գերբարձր հաճախականությունների լաբորատորիաներ, ծանոթացել հագեցվածությանն ու պայմաններին, ծանոթացել են նաեւ «ԱՐԵԱԼ» գծային արագացուցչի աշխատանքին, որը թույլ է տալիս ժամանակակից հետազոտություններ կատարել ֆիզիկայի, կենսաբանության, բժշկության, նյութագիտության եւ քիմիայի ոլորտներում:
Ինչպես նշեց ինստիտուտի տնօրեն Վասիլի Ցականովը, «ԱՐԵԱԼ» գծային արագացուցչով կատարվող հետազոտությունների հիման վրա հայ գիտնականները մշակում են քաղցկեղի բուժման նոր մեթոդներ, ծերացման դեմ դեղեր, նոր նյութեր են ստեղծում եւ բազմաթիվ այլ հետազոտություններ անցկացնում, որոնք կարեւոր են ոչ միայն Հայաստանի, այլեւ ամբողջ աշխարհի համար: