Անհատ վաճառականների կողմից ներկրվող ապրանքների մաքսազերծման գների բարձրացումը առանց կառավարության գիտության լինել չէր կարող։ Այս մասին NEWS.am-ի թղթակցի հետ զրույցում ասաց ԱԺ ԲՀԿ խմբակցության պատգամավոր, Տնտեսական հարցերի մշտական հանձնաժողովի փոխնախագահ Վարդան Բոստանջյանը։
«Որեւէ մեկը չի կարող ինքն իրեն նստել եւ մտածել մաքսատուրքերը բարձրացնելու մասին, քանի որ այդ հարցում պետք է լինի վերադասի համապատասխան հրահանգը»,-նշեց Բոստանջյանը։ Նրա խոսքով՝ նման որոշումը բնավ արդարացված չէ եւ նշանակում է, որ համապատասխան մասնագետները իրավիճակը ճիշտ չեն գնահատում։ «Որքան էլ բյուջետային մուտքերն ավելացնելու անհրաժեշտություն ու պահանջ ունենանք, մենք այդ ճանապարհին չպետք է այնպիսի պայմաներ ստեղծենք, որպեսզի Հայաստանի բնակչությունը դրանից հայտնվի ավելի վատ վիճակում»,-նշեց պատգամավորը: Նրա խոսքով՝ կառավարությունը պետք է գնի համապատասխան միջակայք, «որի պարագայում ապրանքներ ներկրողները, ինչպես նաեւ բացօթյա առեւտրով զբաղվողները կարողանան իրենց սոցիալական բնույթի ոչ մեծ խնդիրները լուծել»։
Նշենք, որ ըստ մամուլի հրապարակումների, անհատ վաճառականների կողմից Թուրքիայից ներկրվող ապրանքների մաքսազերծման հետ կապված խնդիրները հարուցվել են կառավարության գիտությամբ եւ հորդորով, պետբյուջեի մուտքերը լրացնելու համար։ Խնդիրն այն է, որ ներմուծվող ապրանքների մաքսազերծումից ստացվող բյուջետային մուտքերն անցած տարի կանխատեսվածից խիստ ցածր են եղել։ Դրանց ավելացնելու համար կառավարական օղակներում որոշում է կայացվել առանց մաքսազերծման պաշտոնական չափը փոփոխելու մեծացնել մուտքերը։