Բնապահպանության նախարար Էրիկ Գրիգորյանը հանդիպել է Չինաստանի Ժողովրդական Հանրապետության արտակարգ եւ լիազոր դեսպան Թիեն Ըրլոնգի հետ։ Նախարարությունից NEWS.am-ին հայտնում են, որ հանդիպմանը մասնակցել են նաեւ նախարարության ղեկավար կազմի ներկայացուցիչներ եւ դեսպանատան աշխատակիցներ։
Կողմերը շեշտել են երկու երկրների միջեւ առկա համագործակցությանը նոր թափ եւ որակ հաղորդելու անհրաժեշտությունը՝ հատկապես բնապահպանության ոլորտում։
Նախարար Էրիկ Գրիգորյանը հատկանշել է անտառների կառավարման եւ օդի առցանց մոնիթորինգի իրականացման բնագավառում Չինաստանի ունեցած հաջողված փորձի ներդրման ուղղությամբ գործնական քայլեր կատարելու անհրաժեշտությունը։
Մասնավորապես՝ նախարարը հայտնել է, որ Հայաստանը հետաքրքրված է դեգրադացված հողերում անտառներ հիմնելու Չինաստանի փորձով եւ Բնապահպանության նախարարությունն արդեն դիմել է վերջինիս՝ Հանրապետության համապատասխան տարածքներում անտառտնկման փորձնական ծրագիր իրականացնելու առաջարկով։
Հանդիպմանն անդրադարձ է կատարվել նաեւ բնապահպանության ոլորտի աշխատակիցների մասնագիտական կարողությունների մեծացման նպատակով վերապատրաստման կոնկրետ ծրագրեր իրականացնելու հեռանկարներին։