Փանիկում հուլիսի 17-ին տեղի ունեցած միջադեպը կարող է Հայաստանի տարածքում տեղակայված ռուսական ռազմաբազայի կարգավիճակի մասին պայմանագրի որոշ դրույթների վերանայման առիթ դառնալ: Գյումրիում տեղակայված 102-րդ ռուսական ռազմաբազա այցելած Դավիթ Տոնոյանը լրագրողներին ասել է՝ ժամանակի ընթացքում առաջանում են խնդիրներ, որոնք պայմանագրային-իրավական փոփոխություններ են պահանջում, եւ դրանք արվելու են: Հիշեցնենք, որ հուլիսի 17-ին Շիրակի Փանիկ գյուղի բնակիչները կրակոցների ու պայթյունների ձայներ էին լսել: Որոշ ժամանակ անց պարզվել էր, որ դրանց հեղինակը Գյումրիում տեղակայված ռուսական 102-րդ ռազմաբազայի ծառայողներն են. նրանք առանց նախազգուշացնելու եւ առանց փաստաթղթերի գյուղ են մտել եւ զորավարժանք անցկացրել: Դավիթ Տոնոյանն ասում է՝ կատարվածում մեղքի իրենց բաժինն ունեն ե՛ւ ռուսական, ե՛ւ հայկական կողմերը: Նախարարի պնդմամբ՝ վարժանքի մասին ռուս զինվորականները տեղեկացրել են, բայց դրա անցկացման վայրի մասին ոչինչ չեն նշել: Միջադեպի կապակցությամբ երկու կողմերն էլ ծառայողական քննություն են սկսել: Դավիթ Տոնոյանը վստահեցնում է՝ մեղավորները պատժվելու են:
Իրանում մեկ օրվա ընթացքում չորրորդ երկրաշարժն է տեղի ունեցել: Երկուշաբթի հարավ-արեւելյան Քերման նահանգում 5.8 մագնիտուդով հերթական ցնցումն է գրանցվել:
Կիրակի տեղի ունեցած 3 երկրաշարժերից ամենահզորը գրանցվել է Քերմանշահ նահանգում՝ 5.9 մագնիտուդ: Զոհերի մասին տեղեկություններ առայժմ չեն հաղորդվում: Հայտնի է, որ ստորգետնյա ցնցումների հետեւանքով 287 մարդ մարմնական վնասվածքներ է ստացել: Ավելի քան 101 շենք ամբողջությամբ ավերվել է, շուրջ 850-ը՝ մասնակի վնասվել: Երկրաշարժերից հետո երկրի սեյսմոլոգիական ծառայությունը 165 հետցնցում է գրանցել: Աղետի վայրում 15 փրկարարական ջոկատ է աշխատում:
«Քայլ դեպի տուն» ծրագրի շրջանակում պատանիների ու երիտասարդների նոր խումբ է ժամանում Հայաստան: Ծրագրի մասնակիցներից մեկին կհյուրընկալի վարչապետ Նիկոլ Փաշինյանի ընտանիքը: Այս մասին տեղեկացրել է սփյուռքի նախարարը եւ վարչապետի տիկնոջ մասնակցությամբ տեսանյութ հրապարակել: Նշենք, որ «Քայլ դեպի տուն» ծրագրի մասնակիցները 13-21 տարեկան են: Այս տարի մասնակցության շուրջ 550 հայտ է ներկայացվել 26 երկրի հայ համայնքներից: Պատանիներն ու երիտասարդներն այցելում են Հայաստանի պատմամշակութային վայրեր, առաջատար ուսումնական, ստեղծարար եւ տեխնոլոգիական կենտրոններ, մասնակցում հայերենի դասընթացների, ինչպես նաեւ ճամբարային քառօրյա ծրագրի:
Հերթական ահազանգը «Դիլիջան» ազգային պարկում ծառահատումների մասին: Մի խումբ արշավականներ պարկի տարածքում՝ Պարզ լճից դեպի Գոշ գյուղ տանող անտառային ճանապարհին, հատված ծառեր են հայտնաբերել: Ծառագողերը փորձել են կտրված ծառերը թաքցնել՝ դրանք թեփով ծածկելով:
Երեւանում երկու օրվա ընթացքում մի քանի ինքնասպանության փորձ է արվել, երկուսը ողբեգրական ելք են ունեցել: Կիրակի 24-ամյա մի երիտասարդ ցած է նետվել Դավիթաշենի կամրջից: Ահազանգի հետքերով տղամարդու դին գտել են փրկարարները:
Կիեւյան կամրջից էլ միջին տարիքի մի տղամարդ Հրազդան գետն է նետվել: Դին ջրից դուրս է բերել ջրասուզակը: Մահացածի ինքնությունը պարզում են: Եվս մեկ քաղաքացի նետվել է «Հաղթանակ» կամրջից: Տարեց տղամարդը ողջ է մնացել: Նրան հիվանդանոց են տեղափոխել: Բժիշկները տուժածի վիճակը կայուն ծանր են գնահատում:
Հուլիսի 23-ին դոլարը, եվրոն եւ ռուբլին թանկացել են: Դոլարի փոխարժեքը կազմել է 481 դրամ, եվրոյինը՝ 562, ռուբլունը՝ 7 դրամ 62 լումա, ֆունտինը՝ 631 դրամ:
Հուլիսի 24-ին հանրապետությունում սպասվում է առանց տեղումների եղանակ: Օդի ջերմաստիճանը 5-6 աստիճանով կբարձրանա: Ուլտրամանուշակագույն ճառագայթման ինդեքսը՝ 6: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +17+19, ցերեկը՝ +35+37 աստիճան տաքություն: