Բուհերում, քոլեջներում, ուսումնարաններում եւ ավագ դպրոցներում այլեւս չեն լինելու չհաճախող, բայց դիպլոմ ստացող ուսանողներ ու աշակերտներ։ ՀՀ կրթության եւ գիտության նախարար Արայիկ Հարությունյանն այս մասին հայտարարել է ֆեյսբուքյան տեսաուղերձում:
Նա ավագ դպրոցի աշակերտներին, բուհերի ուսանողներին եւ այս ուսումնական հաստատություններում սովորողներին հորդորել է սեպտեմբերի 1-ից անպայման հաճախել դասերի, որպեսզի վերջ դրվի դպրոցներ, քոլեջներ կամ բուհեր չհաճախելու, իսկ հետո դիպլոմ ստանալու արատավոր երեւույթին:
Նախարարը հայտարարել է, որ ուսումնական հաստատություններ հաճախելիությունը խստագույնս վերահսկելու են, քանի որ պետությունը գումար է վճարում ուսումնական հաստատությանը սովորողի համար, բայց ուսումնասիրությունները ցույց են տվել, որ շատ մեծ է դասերի չհաճախողների թիվը։
«Հաջորդ ուսումնական տարվանից այդ գործընթացը լինելու է մեր ուշադրության կենտրոնում, որպեսզի հասկանանք՝ արդյո՞ք արդարացված են պետության կողմից վճարվող մեծ գումարները»,- ասել է Արայիկ Հարությունյանը: