Land Rover ընկերությունը հաստատել է Defender–ի նոր սերնդի մշակումը։ Ավտոմեքենայի վաճառքը կսկսվի 2020 թվականին, հայտնում է Autonews-ը։
Ամենագնացի մասին ամբողջ տեղեկատվությունը դեռ գաղտնի է պահվում։ Autocar պարբերականի տվյալներով՝ հաջորդ Land Rover Defender-ը կկառուցեն այլումինային ճարտարապետության վրա։ Ամենագնացը բազմաթիվ բաղադրիչներ ու տեխնիկական լուծումներ է փոխառելու Jaguar Land Rover (JLR) –ի մյուս մեքենաներից։ Ընկերությունը ծրագրում է տարեկան վաճառել Defender-ի մոտ 10 հազար նմուշ։
Motoring պարբերականն էլ իր հերթին հայտնել է, որ հաճախորդներին հասանելի են լինելու 3 ու 5 դռնանի տարբերակներ՝ բաց ու փակ թափքերով, շքեղ մոդիֆիկացիա , նաև էքստրեմալ ճանապարհային պայմանների համար տարբերակ։ Նորույթի շարժիչային գամման պետք է ներառի բենզինային ու դիզելային չորսցիլինդրանի երկլիտր ագրեգատներ, նաև երեք լիտրանոց V6 շարժիչներ։
Բացի դրանից, վաճառքում կհայտնվի նաև մեքենայի էլեկտրական տարբերակը։ Նման մոդիֆիկացիան սարքավորված է լինելու էլեկտրական շարժիչով ու մարտկոցով։ Սակայն հետագայում կարող է ներկայացված լինել նաև էկոլոգիապես մաքուր ամենագնացի ավելի հզոր մոդիֆիկացիա։