Իրաքում Ֆրանսիայի եւ Գերմանիայի քաղաքացիները ցմահ բանտարկության են դատապարտվել «Իսլամական պետություն» ահաբեկչական խմբավորմանն անդամակցելու համար, հաղորդում է AFP-ն: 58-ամյա ֆրանսիացի Լախեն Գեբաուդը եւ Նադիա անունով գերմանուհին դատապարտվել են Բաղդադի կենտրոնական քրեական դատարանում:
Նադիայի մայրը՝ ԳԴՀ-ի մարոկկացի քաղաքացին, հունվարին մահվան էր դատապարտվել «ԻՊ»-ին անդամակցության համար, սակայն դատավճիռը փոխարինվել էր ցմահ բանտարկությամբ: Մայրն ու դուստրը ձերբակալվել են հուլիսի 20-ին Մոսուլում՝ Իրաքում ջիհադականների նախկին դե ֆակտո մայրաքաղաքում, որը իրաքյան ուժերին հաջողվել էր հետ վերցնել անցյալ տարվա դեկտեմբերին:
Ինքը՝ Նադիան, հայտարարել է, որ Սիրիայից Իրաք է գնացել՝ ««ԻՊ»-ի մարդկանցից փախչելու համար»: Նադիայի փաստաբանը ընդգծել է, որ այն ժամանակ կինն անչափահաս էր եւ Սիրիայում իր ամուսնությունն «ԻՊ»-ի ջիհադականի հետ «չափահաս մարդու որոշում չէր»:
