2015թ.-ի սեպտեմբերից առ այսօր մաքսային ազատումների գործիքով հավանության է արժանացել շուրջ 68 ծրագիր։ Այս մասին այսօր՝ օգոստոսի 9-ին, Կառավարության նիստի ժամանակ ասաց տնտեսական զարգացման և ներդրումների նախարար Արծվիկ Մինասյանը:
«Ընդհանուր ներդրումային փաթեթը եղել է 668 միլիոն դոլարի չափով, ներկրվող սարքավորումները, որոնք որ պետք է համապատասխանեն այն պահանջներին, որ սրանք չեն կարող Եվրասիական տնտեսական միության տարածքում արտադրվեն կամ առնվազն այն ծավալով արտադրվեն, որ բավարարում է ներդրողների պահանջներին, 84 միլիարդ դրամ է: Ծրագրով նախատեսված աշխատատեղերի թիվը 6 հազար 214 է եղել, մոնիտորինգը ցույց է տվել, որ այս պահի դրությամբ ստեղծվածները 4 հազար 45-ն են»,- ասաց նախարարը:
Արծվիկ Մինասյանը հայտնեց, որ նոր Կառավարության օրոք ընդունվել է 6 այդպիսի ծրագիր. «Ընդհանուր ներդումները կազմել են 42 միլիոն դոլար, ներկրվող սարքավորումների ընդհանուր արժեքը՝ 12 միլիարդ դրամ և ծրագրով նախատեսված աշխատատեղերի թիվը՝ 609»:
Նախարարի խոսքով, ԱԱՀ գործիքով նույն ժամանակահատվածում հավանության է արժանացել 4 ծրագիր՝ 5,26 միլիարդ դրամ ընդհանուր ներդրումային ծավալով:
«Սարքավորումները 1,87 միլիարդ դրամի չափով են, նախատեսվող աշխատատեղերը՝ ավելի քան 200»,-ասաց Մինասյանը։