«Բոնվառոն» ՍՊԸ-ն առաջին ընկերությունն է, որ ստացավ «Մեղրի» ազատ տնտեսական գոտու տարածքում շահագործողի թույլտվություն՝ մշակող արդյունաբերության եւ լոգիստիկ ոլորտներում գործունեություն ծավալելու նպատակով:
Այսօր՝ օգոստոսի 9-ին, Կառավարության նիստի ժամանակ Տնտեսական զարգացման և ներդրումների նախարար Արծվիկ Մինասյանը նշեց, որ նախատեսված է ծրագրի ընթացքում արտահանման տարեկան ծավալները 1 մլն ԱՄՆ դոլարից հասցնել 5,1 մլն դոլարի:
«Կարելի է ասել՝ մեր առաջին ծիծեռնակն է որպես շահագործող այս ոլորտում: Ընկերությունը նախատեսում է իրականացնել շուրջ 195 մլն դոլարի ներդրումներ, ստեղծվելու են 102 նոր աշխատատեղ: Արտահանման ուղղություններն են Ռուսաստանը, Վրաստանը, Իրանը և այլ երկրներ»,- ասաց Մինասյանը:
Վարչապետ Նիկոլ Փաշինյանն էլ նշեց, որ շատ կարեւոր է մոնիտորինգ անցկացնել՝ հասկանալու համար, թե ինչ դժվարությունների է բախվում ընկերությունը, որպեսզի դրանք հետագայում կարգավորեն:
«Բոլոր օրինական միջոցները պետք է ձեռնարկենք, որ այս նախագիծը լինի հաջողված»,- ասաց նա:
Նախագիծն ընդունվեց միաձայն: