Երբ խոսվում է անցումային արդարադատության մասին, միջազգային հանրությունը դա ընկալում է որպես հայտարարություն այն մասին, որ տվյալ երկրում ճգնաժամային իրավիճակ է առաջացել, սակայն իրականում դա կարող է չհամընկնել իրականության հետ։ Այս մասին օգոստոսի 21-ին՝ լրագրողների հետ հանդիպմանը հայտարարել է ՀՀ մարդու իրավունքների առաջին պաշտպան Լարիսա Ալավերդյանը՝ մեկնաբանելով ՀՀ վարչապետ Նիկոլ Փաշինյանի հայտարարությունը անցումային արդարադատության մարմիններ ստեղծելու մասին։
Նրա կարծիքով՝ ՀՀ դատական համակարգում քիչ դրական բան չկա. «Օրինակ, մեր դատական համակարգում կան հրաշալի մասնագետներ, լավ կադրեր»։
Նա հորդորել է ՀՀ իշխանություններին լուրջ քննարկումներ անցկացնել այդ հարցով, քանի որ հանրային շահերին դիպչելու պարագայում երկրի հեղինակությունը շատ կարող է տուժել։
Իրավապաշտպանը նշել է, որ նման երեւույթներ գրանցվել են Պերուում, Չիլիում, մի շարք աֆրիկյան երկրներում, որտեղ ներքաղաքական իրավիճակը չափազանց բարդ էր։