Բեռլինում պայթուցիկի կիրառմամբ ահաբեկչական հարձակման նախապատրաստման կասկածանքով 31-ամյա ՌԴ քաղաքացի է ձերբակալվել: Այս մասին հաղորդում է «ՌԻԱ Նովոստի»-ն՝ վկայակոչելով Գերմանիայի Դաշնային Հանրապետության գլխավոր դատախազությունը:
«Գլխավոր դատախազությունն 2018 թվականի օգոստոսի 9-ի որոշման հիման վրա կարգադրել է ձերբակալել 31-ամյա ՌԴ քաղաքացի Մագոմեդ Ալի Ս-ին: Ձերբակալությունն իրականացվել է Դաշնային քրեական ոստիկանության եւ Բեռլինի քրեական ոստիկանության հատուկ ստորաբաժանման կողմից: Բացի այդ, կասկածյալի բնակարանը խուզարկվել է»,- նշվում է չորեքշաբթի օրը տարածված հաղորդագրության մեջ:
Փաստաթղթում նշվում է, որ ձերբակալվածը «կասկածվում է պետության դեմ ծանր հանցագործություն նախապատրաստելու եւ պայթուցիկ նյութերի կիրառմամբ հանցագործություն նախապատրաստելու համար»: