Գերմանիան Եվրամիության առանցքային երկիրն է եւ բնական է, որ այն փորձում է տնտեսապես եւ քաղաքականապես ազդել ԵՄ-ի հետ անմիջական հարեւանությամբ գտնվող տարածաշրջանների վրա: NEWS.am-ի թղթակցի հետ զրույցում այս մասին ասել է «Մոդուս Վիվենդի» կենտրոնի տնօրեն, քաղաքագետ Արա Պապյանը՝ մեկնաբանելով Գերմանիայի կանցլեր Անգելա Մերկելի այցը Հարավային Կովկասի երկրներ:
Նրա խոսքով, Անդրկովկասի երկրներից մեկը՝ Վրաստանը, բազմիցս հայտարարել է, որ ցանկանում է միանալ Եվրամիությանը եւ ՆԱՏՕ-ին: «Ինձ համար այս ուղեւորությունը տարածաշրջանի հետ ծանոթանալու շրջագայություն էր, թեեւ կոնկրետ նպատակներ է հետապնդում: Վրաստանի համար, կարծում եմ, նպատակը, ՆԱՏՕ-ին անդամակցելու հնարավորությունն է», - բացատրել է Պապյանը:
Ընդ որում նա նշել է, որ Մերկելն այս հարցի վերաբերյալ բավական զուսպ է արձագանքել, թեեւ Բեռլինը, ինչպես նշել է քաղաքագետը, հատկապես ՆԱՏՕ-ի ընդլայնման հարցերով ի տարբերություն դաշինքի անդամ ԱՄՆ-ի, ավանդաբար ավելի զուսպ քաղաքականություն է զբաղեցնում:
Փորձագետը շեշտել է, որ այս դեպքում իրավիճակը մի փոքր այլ է, եւ Գերմանիայի հետ Ռուսաստանի հարաբերությունները այլ ձեւաչափ ունեն, քանի որ Բեռլինը լրջորեն կախված է ռուսական գազի եւ նավթի մատակարարումներից:
Հիշեցնենք, որ օգոստոսի 23-24-ը Գերմանիայի կանցլեր Անգելա Մերկելը պաշտոնական այց է կատարել Վրաստան: Վրաստանում Մերկելը բանակցություններ է վարել վարչապետ Մամուկա Բախտաձեի եւ նախագահ Գեորգի Մարգվելաշվիլիի հետ: Օգոստոսի 24-ին Գերմանիայի կանցլերը այցելեց Երեւան, իսկ 25-ին`Բաքու:
