Brexit-ից հետո ԵՄ-ի ֆինանսական շուկաներին լայն հասանելիություն ունենալու Մեծ Բրիտանիայի ակնկալիքները կարծես թե, քիչ հավանական են:
Այս մասին հայտարարել է Գերմանիայի ֆինանսների նախարարության բարձրաստիճան ներկայացուցիչը, գրում է Reuters-ը:
Համակարգը, որով Լոնդոնը ցանկանում է աշխատել, օգտագործվում է ԱՄՆ-ի, Սինգապուրի եւ Ճապոնիայի բանկերի կողմից` բանկային ոլորտում որոշակի գործարքների իրականացման համար:
Սակայն Բրիտանիան Brexit-ից հետո ավելի լայն հնարավորությունների է հավակնում, մասնավորապես այնպիսի բանկային գործարքների, ինչպիսիք են վարկավորումը եւ ակտիվների կառավարումը:
Գերմանիայի ֆինանսական շուկաների գլխավոր տնօրեն Լեւին Հոլդը հայտարարել է, որ կարճաժամկետ հեռանկարում բանկային ոլորտում համարժեքության ռեժիմների ընդլայնումը քիչ հավանական է, քանի որ դա կարող է որոշակի խնդիրների հանգեցնել:
Նա նաեւ հավելել է, որ ԵՄ-ն պետք է 2020 թվականի վերջին Բրիտանիայի վերաբերյալ համարժեքության մասին առանցքային որոշումներ կայացնի: