Եւ ես, եւ Արմեն Գրիգորյանը հակառուսներ չենք, մենք ժամանակին որպես ակտիվ քաղաքացիներ գործիչներ Ռուսաստանի քաղաքականության վերաբերյալ արտահայտել ենք մեր միտքը: Այդ մասին այսօր՝ սեպտեմբերի 6-ին ասաց ՀՀ վերահսկողական ծառայության պետ Դավիթ Սանասարյանը՝ պատասխանելով հարցին, թե ինչպես է մեկնաբանում շրջանառվող լուրերը, որ ինքը ՌԴ-ի համար համար անցանկալի է նման անձանց ներկայությունն իշխանական վերնախավում:
«Մենք չենք եղել հակառուսներ, ես ինքս որեւէ ազգի հակա չեմ: Իսկ սա ուղղակի ցեխ շպրտոցի է, քարոզչական ինչ-որ հնարք են օգտագործում: Կան դաշտում մարդիկ, ում ոտքը տրորում ենք, եւ այսպիսի բաներ են պատվիրում, բայց դե մենք մեր գործով ենք զբաղվում: Եւ հետո, այլ պետության ղեկավարները չեն կարող որոշում կայացնել, թե մեր պետության մեջ ինչ կադրային քաղաքականություն ենք իրականացնում:Սա ուղղակի վիրավորական է, երբ ասում են՝ Կրեմլը գոհ չէ նշանակումներից, գոհ պետք է լինեն Հայաստանի Հանրապետության քաղաքացիները եւ վարչապետը»,- ասաց Սանասարյանը:
Նշենք, որ ըստ մամուլի հրապարակումների, Հայաստանի ռազմավարական գործընկեր ՌԴ-ի համար շարունակում են անընդունելի մնալ մի շարք առանցքային պաշտոնյաներ:
Այս առումով, ՌԴ-ի համար անցանկալի առանցքային դեմքերից են ԱԱԽ քարտուղար Արմեն Գրիգորյանն ու Պետական վերահսկողական ծառայության ղեկավար Դավիթ Սանասարյանը:
Մամուլում գրվել է, որ Արմեն Գրիգորյանին ռուսական կողմը չի վստահում ռազմաքաղաքական բնույթի շատ փաստաթղթեր՝ մտածելով, որ դրանք կարող են հայտնվել ամերիկացիների ձեռքում: Նման խնդիրներ կան նաեւ Դավիթ Սանասարյանի դեպքում: