ԱՄՆ եւ Իսրայելի հետախուզական ծառայությունները տեղեկատվական պատերազմ են ծավալել, որ Իրանի իշխանություններին սեփական ժողովրդի աչքերում անվանարկեն: Հինգշաբթի նման կարծիք է հայտնել Իրանի ղեկավար եւ հոգեւոր առաջնորդ այաթոլլահ Ալի Խամենեին:
«ԱՄՆ եւ Իսրայելի ու հարեւան երկրներում նրանց կողմնակիցների հետախուզական ծառայությունները հատուկ ստորաբաժանումներ են ստեղծել, որպեսզի տեղեկատվական պատերազմ վարեն: Նրանց նպատակն է տեղեկատվական տարածքը քարոզչությամբ լցնելը եւ հասարակական կարծիքի վրա ներգործելը»,- ILNA գործակալության փոխանցմամբ՝ ասել է Խամենեին:
Նա հավելել է, որ «ԱՄՆ-ն եւ Իսրայելը այսպիսով ցանկանում են ժողովրդին վաղվա օրվա հանդեպ անվստահություն ներշնչել, բնակչության աչքերում անվանարկել պետական ինստիտուտները եւ տնտեսական խնդիրների վերաբերյալ մարդկանց պատկերացումներն ուռճացնել»:
Այս տարեսկզբին Իրանի ազգային արժույթը սկսել էր արժեզրկվել: Այս գործընթացն արագացել էր այն բանից հետո, երբ ԱՄՆ նախագահ Դոնալդ Թրամփը գարնանը հայտարարել էր միջուկային գործարքից Վաշինգթոնի դուրս գալու մասին, որը սահմանափակում էր Թեհրանի միջուկային մշակումները ՄԱԿ ԱԽ գոյություն ունեցող պատժամիջոցների եւ ԱՄՆ-ի ու ԵՄ-ի սահմանած միակողմանի սահմանափակող միջոցառումների չեղարկման դիմաց:
Մայիսի վերջին իրանական ռիալի փոխարժեքը կազմել է դոլարի դիմաց 65 հազար ռիալ: Սեպտեմբերի սկզբին այս ցուցանիշն անցել է 145 հազար ռիալ նիշից: