Սեպտեմբերի 8-ին Մոսկվայում կայանալիք Փաշինյան-Պուտին հանդիպմանը կողմերը պետք է բաց խոսեն երկու երկրների միջև առկա խնդիրների մասին: Այսօր՝ սեպտեմբերի 6-ին ՀՀ Ազգային ժողովում լրագրողների հետ զրույցում ասաց ԱԺ ՀՅԴ խմբակցության ղեկավար Արմեն Ռուստամյանը՝ հավելելով, որ մեծ ակնկալիքներ ունեն այս հանդիպումից:
«Շատ մտահոգիչ հայտարարություններ են արվում, խոսվում է այն մասին, որ մեր հարաբերություններում ինչ-որ խնդիրներ են առաջացել: Ես կարծում եմ, որ մեր ռազմավարական շահերն այնքան կարևոր և նշանակալից են, որ ցանկացած խնդիր պետք է ստորադասվի։ Այն խնդիրները, որ գոյություն ունեն, արդեն մտահոգիչ են, եւ նման հանդիպումները նրա համար են, որ պարզաբանվեն և լուծում ստանան, և Ռուսատանի հետ մեր ռազմավարական գործընկերությունը չխաթարվի»,- ասաց նա։
Ռուստամյանի խոսքով՝ այս հանդիպումը լավ առիթ է, որ երկու երկրների ղեկավարները խոսեն Արցախի հիմնախնդրից։
«Հայաստանն իր արտաքին քաղաքականությունը վարում է իր կենսական շահերից և առաջնահերթություններից ելնելով։ Կարևոր է, որ հստակ ներկայացվի արցախյան հիմնախնդրի կարգավորման հետ կապված Հայաստանի դիրքորոշումը: Այո՛, տարբեր հայտարարություններ եղել են, բայց հայեցակարգված, մեկ ընդհանուր տրամաբանության մեջ պետք է ներկայացնել»,- ասաց նա։
Պատգամավորը նշեց, որ վարչապետ Նիկոլ Փաշինյանի հետ առաջին իսկ հանդիպման ժամանակ խոսել են արցախյան խնդրի վերաբերյալ նրա դիրքորոշման մասին: «Տեսակետն այն էր, որ Հայաստանը պետք է առաջնորդվի արցախյան խնդրի լուծման տրամաբանությամբ, որ պետք է հենվի ԼՂՀ ժողովրդի արտահայտած կամքի վրա»։
Ռուստամյանը նկատեց, որ խնդիրներ կան, որոնք առաջացել են վարչապետի՝ Արցախին բանակցային կողմ դարձնելու հայտարարությունից հետո։
«Այդ հայտարարությունը չպետք է մեկնաբանվի այնպես, թե, իբր, Հայաստանը խուսափում է բանակցություններից։ Այն տրամաբանությունը, որը մինչև հիմա ունեցել ենք, և այն փաթեթը, որ կար սեղանին, առնվազն վերաբերվում էր կարևորագույն խնդրին՝ կանխել նոր պատերազմը»,- ասաց նա՝ միաժամանակ նշելով, որ չպետք է թույլ տալ, որ Ադրբեջանը շրջանցի Սանկտ Պետերբուրգի և Վիեննայի պայմանավորությունները՝ հաշվի առնելով Հայաստանում տեղի ունեցած փոփոխությունները։