Հայաստանի կառավարությունը հնարավորություններ է ստեղծում գործարար միջավայրի համար, որպեսզի ներդրողներն իրենց անկաշկանդ զգան, մարզերն էլ՝ զարգանան: Այս մասին այսօր՝ սեպտեմբերի 9-ին Իջեւանում «Իմ քայլը հանուն Տավուշի» ներդրումային համաժողովի ժամանակ հայտարարել է վարչապետ Նիկոլ Փաշինյանը:
«Մեր նպատակն արտերկրից ներդրողների հրավիրելն է։ Պետք է մարզ առ մարզ փոխենք մեր երկիրը: Հայաստանում տնտեսությունը կարող է զարգանալ միայն այն դեպքում, երբ գործարարն ու կառավարությունը դառնան գործընկեր, երբ հավասար ու արդար միջավայր լինի: Մենք հնարավորություն ենք տալիս ազատ գործելու։ Ուզում ենք քաջալերել Հայաստանում գործ սկսող բոլոր մարդկանց: Վստահ եղեք, որ այստեղ հեռանկարային է ձեր բիզնեսը»,- ասել է վարչապետը։
Նա անդրադարձել է նաեւ հայ-ռուսական հարաբերություններին՝ նշելով, որ դրանք նոր՝ աննախադեպ բարձր մակարդակի վրա են:
«Ուշ գիշերն եմ վերադարձել Մոսկվայից: ՌԴ նախագահ Վլադիմիր Պուտինի հետ կարեւոր հարցեր ենք քննարկել: Կարող եմ ասել, որ մեր միջեւ լիարժեք փոխվստահություն կա, եւ կարծում եմ՝ այդ մթնոլորտը կստիպի, որ մեր երկրների տնտեսական կապերը զարգանան եւ դա եւս մեկ գործոն կլինի, որ Ռուսաստանում մեր հայազգի գործարարները ոչ միայն այնտեղ գործեն, այլ նաեւ Հայաստանում»,- ասել է վարչապետը: