ՊԵԿ-ը չունի դիմակավորված անձնակազմ, ունի հատուկ բաժին, որոնք դիմակավորված չեն, բայց ունեն համազգեստ: Այս մասին, այսօր՝ սեպտեմբերի 10-ին, լրագրողների հետ հանդիպման ժամանակ նշել է ՊԵԿ նախագահ Դավիթ Անանյանը՝ անդրադառնալով տեղեկություններին, որ ՊԵԿ-ի աշխատակիցները սեւ դիմակներով ներխուժել են ԲՀԿ նախագահ Գագիկ Ծառուկյանին պատկանող գազալցակայանի տարածք եւ պահանջել ինչ-որ հաշվապահական փաստաթղթեր:
«Ավելին, այդ անձինք երբ գնում են իրենց գործողություններն իրականացնելու, գրեթե գնում են առանց զենքի»,-ասաց Դավիթ Անանյանը՝ հավելելով, որ Գագիկ Ծառուկյանի որեւէ օբյեկտում որեւէ գործողություն չի իրականացվել:
Նրա խոսքով, նախկինում, այո, որոշակի գործողություններ իրականացվել են եւ դրանք առնչվել են գազալցակայաններին. «Ընդհանուր առմամբ, մենք 190 գազալցակայաններում գործողություններ ենք կատարել վերջին 4 ամսում, որից 110-ում խախտումներ ենք արձանագրել»,-ասաց ՊԵԿ նախագահը:
Ավելի վաղ NEWS.am-ը հայտնել էր, որ «Ժամանակ» թերթը գրել էր, որ իր տեղեկություններով՝ օրերս ՊԵԿ աշխատակիցները սեւ դիմակներով ներխուժել են ԲՀԿ նախագահ Գագիկ Ծառուկյանին պատկանող գազալցակայանի տարածք եւ պահանջել ինչ-որ հաշվապահական փաստաթղթեր:
«Այդ փաստաթղթերը ստանալուց հետո նրանք հեռացել են: Կարելի է, իհարկե, ասել, որ տեղի ունեցածը ոչ մի կապ չունի ԲՀԿ-ի եւ «Քաղաքացիական պայմանագիր» կուսակցության հարաբերությունների հետ, որ սա ՊԵԿ-ի կողմից կազմակերպված գործողություն է, որը ոչ միայն համաձայնեցված չի եղել Նիկոլ Փաշինյանի հետ, այլ նա ընդհանրապես տեղյակ էլ չի լինում նման միջոցառումների մասին:
Բայց քիչ հավանական է, որ սա ՊԵԿ-ի ու նրա ղեկավար Դավիթ Անանյանի ինքնագործունեության արդյունքն է»,-գրել էր թերթը: