ՀՀ վարչապետ Նիկոլ Փաշինյանն այնքան լարված է եղել, որ երեւի թե մոռացել է ՀՀ-ում գործող Սահմանադրության մասին։ Այս մասին այսօր՝ սեպտեմբերի 10-ին լրագրողների հետ զրույցում հայտարարեց ՀՀԿ խմբակցության պատգամավոր Արմեն Աշոտյանը՝ մեկնաբանելով արտահերթ ընտրություններ անցկացնելու համար սահմանադրական փոփոխություններ անցկացնելու Փաշինյանի հայտարարությունը։
«Ես վստահ եմ՝ Նիկոլ Փաշինյանն այնքան հագեցած, հոգնեցուցիչ եւ հյուծող այց է ունեցել, այնքան լարված է եղել մինչեւ այց, այցի ընթացքում եւ հետո, որ երեւի թե մոռացել է, որ ՀՀ-ում կա գործող Սահմանադրություն եւ իր քաղաքական ցանկությունները, այնուհանդերձ, պետք է ինստուտցիոնալիզացվի բացառապես ՀՀ Սահմանադրության շրջանակներում»,–շեշտեց պատգամավորը։
Իսկ, թե ինչու ՀՀԿ-ն չի ցանկանում Սահմանադրությունը փոխել, նա հարցին պատասխանեց կենցաղային օրինակով. «Եթե մի գեղեցիկ, խելացի չամուսնացած աղջկա հարցնեն կամուսնանա՞ս, կասի՞ այո, եթե չգիտի` ով է այդ մարդը, ինչ պայմաններով է»։
Պատգամավորը մտավախություն ունի, որ Փաշինյանի առաջարկած սահմանադրական փոփոխությունը գործող իշխանությունների վերարտադրության նպատակ կարող է հետապնդել. «Սահմանադրական փոփոխություն կոչվածը, եթե բացառապես նպաստելու է գործող իշխանությունների վերարտադրությանը, ապա կրկնում են այն արատավոր պրակտիկան, որի մեջ նախկինում ընդդիմադիր Նիկոլ Փաշինյանը մեղադրում էր մեզ: Եթե սահմանադրական փոփոխությունները տալու են պետության զարգացման հնարավորություն, տեսլական, առաջընթաց, ապա խորհրդարանական կառավարության մոդելից որեւէ մեկը, այդ թվում՝ գործող իշխանությունը, չի հրաժարվել: Սահմանադրությունը փոխել՝ վերարտադրվելու համար, կարծում եմ բնորոշ է օրինակ Ադրբեջանին, Թուրքմենստանին»:
Աշոտյանը կարծիք հայտնեց, որ բազմաթիվ խնդիրների մեծ խրված Նիկոլ Փաշինյանը փորձում է հասարակության ուշադրությունը շեղել բացառապես պայքարելով նախկին իշխանությունների ուրվականի դեմ։
Պատգամավորը համոզված է՝ սահմանադրությունները չեն կարող փոխվել այս կամ այն անձի ցանկություններից ու նկրտումներից ելնելով: Իսկ իշխանությունները, նրա կարծիքով, խնդիր ունեն այս բարձր լեգիտիմությունը, որ դեռ գոյություն ունի վարչապետի անձի շուրջ, ուղղել բարեփոխումներին, ժողովրդավարության կայացմանը:
Աշոտյանը եզրափակեց՝ «մարդիկ սիրում են ինձ» կարգախոսով փորձել քանդել պետության հիմքերը անպատասխանատու է եւ բավականին վտանգավոր։