ՕՊԵԿ+ նախարարական մոնիթորինգային կոմիտեի նիստը, որը տեղի կունենա սեպտեմբերի 23-ին Ալժիրում, կարող է դառնալ կոմիտեի ամբողջ պատմության մեջ մասնակիցների թվով ամենամեծը՝ հանդիպմանը հրավիրված է 16 երկիր, ՏԱՍՍ-ին հայտնել է պատվիրակություններից մեկում աղբյուրը:
«Հրավիրել են ընդհանուր 16 երկրի: Հանդիպումը կանցկացվի «մինի-ՕՊԵԿ» ձեւաչափով: Հանդիպմանը չեն գա միայն Էկվադորը եւ Հասարակածային Գվինեան»,- ասել է նա: Առայժմ հայտնի չէ, թե Իրանն արդյոք կմասնակցի կոմիտեի նիստին: Նախարարական մոնիթորինգային կոմիտեի մեջ է մտնում 6 երկիր՝ Ռուսաստանը, Սաուդյան Արաբիան, Քուվեյթը, Վենեսուելան, Ալժիրը եւ Օմանը:
Աղբյուրը հայտնել է նաեւ, որ սեպտեմբերի 11-ին նախատեսված տեխնիկական կոմիտեի փորձագետների խորհրդակցությունը, որը պետք է քննարկեր արդյունահանման վերականգնման քվոտաների բաշխման մեխանիզմը, տեղափոխվել է սեպտեմբերի 17: Նախատեսվում էր այն անցկացնել տեսահամաժողովի ռեժիմում:
Ալժիրում սեպտեմբերի 23-ին տեղի կունենա նախարարական կոմիտեի 10 նիստ, կոմիտեի նախարարների հանդիպումներն անցկացվում են 2017 թվականի սկզբից 2 ամիսը մեկ անգամ, երբ սկսեց գործել արդյունահանման սահմանափակման համաձայնագիրը: Կոմիտեի գործառույթն է ՕՊԵԿ+ բոլոր երկրներին նավթի շուկայի համատեղ կարգավորման միջոցառումներ հրահանգել: Այսպես՝ հունիսին Վիեննայում տեղի ունեցած վերջին նիստում այն հրահանգել էր մեղմել գործող սահմանափակումները եւ արդյունահանումը մեծացնել օրական 1 մլն բարելով՝ նկատի ունենալով արդյունահանման անկումը Իրանում, Վենեսուելայում, Մեքսիկայում եւ Լիբիայում: Կոմիտեն նաեւ ամփոփում է գործարքի կատարման ընթացիկ արդյունքները: Հուլիսին համաձայնագիրը կատարվել էր ծրագրածի 109 տոկոսով:
Հունիսին արդյունահանման աճի որոշում ընդունելով՝ նախարարները դեռեւս չեն պայմանավորվել վերականգնման անհատական քվոտաների հարցում, քանի որ համաձայնագրին միացած ոչ բոլոր երկրներն ունեն ազատ հզորություններ արդյունահանման աճի համար: