Ես փոխանցեցի իմ ժպիտը եւ երեւանցիների գերակշիռ մեծամասնությունը հետ ուղարկեց իր ժպիտը. այսուհետ Երեւանը պետք է ցուցանակ ունենա, որ մուտքը ժպիտով է: Այս մասին, այսօր՝ սեպտեմբերի 15-ին, Մալաթիա Սեբաստիա վարչական շրջանում իր քարոզարշավի ժամանակ լրագրողների հետ զրույցում նշեց «Ժառանգություն» կուսակցության առաջնորդ, քաղաքապետի թեկնածու Րաֆֆի Հովհաննիսյանը:
«Մենք զգում ենք, որ շատ դրական լիցքեր կան: Մարդիկ հասկանում են, որ շատ լավ թեկնածուներ, լավ ցուցակներ կան, ոչ մեկը սեւ չի, ոչ մեկը սպիտակ չի: բոլորս էլ երեւանցին ու հայաստանցի ենք, շատ հպարտ ենք դրանով: Մենք տեսել ենք, որ կան խնդիրներ, մարդիկ հանդիպումների ժամանակ դրանց բարձրացնում են, հարկերի, մաքսերի, կանաչ տարածքների, աշխատատեղերի, տրանսպորտի, վերելակների հետ կապված հարցեր»,-ասաց նա:
Րաֆֆի հովհաննիսյանը տեղեկացրեց, որ հաճախ քարոզարշավի են գնում առանց տեսախցիկների ու վկաներ. « «Գնում ենք մեր փոքրիկ խմբով, կամ ես առանձին: Վերելակ ենք նստում, մարդկանց վիճակն ենք հարցնում եւ հասկանում ենք, որ սա երկարատեւ պայքար է: Մենք շատ դրական ենք տրամադրված, կարծում ենք, որ շարքային երեւանցին հասկանում է, որ սա շատ պատասխանատու ընտրություն է:
Մենք մեր զրույցներում չենք ասում՝ միայն մեզ ընտրեք, ասում ենք՝ ծանրութեթեւ արեք, դուք եք որոշելու: Մենք պետք է պատասխանատու լինենք սեպտեմբերի 23-ին մեր նոր քաղաքապետարանի, մեր նոր ավագանու համար»:
«Ժառանգության.» թեկնածուն հաջողություն մաղթեց բոլոր թեկնածուներին եւ հույս հայտնեց, որ սեպտեմբերի 23-ին երեւանցիները իրենց խղճի մտոք կքվեարկեն. «Վերջին 20 տարվա ընթացքում առաջին անգամ քաղաքացին իրեն պատկանող քաղաքապետարան կընտրի: Մենք ժպտում ենք, ծրագրերի մասին ենք խոսում, կենտրոնանում ենք մեր վրա: Մենք ուզում ենք, որ այս հրաշալի վերելքը, որ ապրել է Հայաստանը, ամբողջանա: Դրա համար մասնակցում ենք դա ամբողջացնելու, արձանագրելու համար: Մենք վստահ ենք, որ ընտրությունից հետո մեր մասնակցությամբ կտեսնենք ոչ թե տարբաժանված, բարիկադներով Երեւան, այլ միասնական, ոգեւղեն, ժպիտով Երեւան, որը պետք է անցնի ր խնդիրների լուծմանը: Դա ժամանակակից մայրաքաղաք կերտելն է՝ աշխատատեղերով եւ առանց որեւէ անօթեւան ընտանիքի: Դա մեր հանձնառություն է»: