Բոլորի համար էլ հետաքրքիր կլինի «Բարգավաճ Հայաստան» կուսակցության քաղաքապետի թեկնածու Նաիրա Զոհրաբանի եւ «ԻՄ քայլը» դաշինքից քաղաքապետի թեկնածու Հայկ Մարությանի բանավեճը։ Այս մասին սեպտեմբերի 17-ին ԱԺ-ում ավանդական ճեպազրույցների ժամանակ ասաց «Ծառուկյան» խմբակցության քարտուղար Վահե Էնֆիաջյանը։
Նրա խոսքով՝ եթե Մարությանի մոտ կա ցանկություն բանավիճելու եւ չկա մտավախություն, ապա նման բանավեճը շատ տեղին կլինի։
«Սոցհարցումների արդյունքներով հիմնական թեկնածուները Հայկ Մարությանն ու Նաիրա Զոհրաբյանն են։ Հանրությանը հետաքրքիր կլինի նրանց միջեւ բանավեճը»,–նկատեց Էնֆիաջյանը։
Նա հավելեց, որ իրենք որեւէ մեկին սպիտակացնելու կամ սեւացնելու ցանկություն չունեն, ապա հույս հայտնեց, որ հավասար պայմաններով հանդիպում տեղի կունենա։
«Մենք վստահ ենք, որ Նաիրա Զոհրաբյանը երկրի ներքաղաքական գործընթացներին տեղյակ մարդ է, կազմակերպչական ջիղ ու ունակություններ ունի՝ Երեւանում փոփոխություններ իրականացնելու, այս առումով մենք որեւիցե խնդիր չենք տեսնում»,–եզրափակեց Վահե Էնֆիաջյանը։