Սեպտեմբերի 21-ին, Հանրապետության անկախության օրվան նվիրված ծրագրի շրջանակում անցկացվելու է «Սելֆի ժամ» խորագիրը կրող միջոցառումը։ Այս մասին այսօր՝ սեպտեմբերի 18-ին, Հանրապետության հրապարակում անցկացվող մամուլի ասուլիսի ժամանակ նշեց Մշակույթի նախարար Լիլիթ Մակունցը:
Նրա խոսքով, այդ միջոցառման շրջանակում ժամը 14:00-ից մեկ ժամվա ընթացքում Հանրապետության հրապարակում հանրությունը կկարողանա շփվել եւ լուսանկարվել հայտնի գործիչների հետ:
Մակունցը նշեց, որ բազմազան միջոցառումներ են կազմակերպվելու, մշակութային միջոցառումները եւս լինելու են բազմաժանր, լինելու է եւ ռոք երաժշտություն, եւ ջազ, փոփ, դասական, ազգային ու էլեկտրոնային երաժշտություն:
«Միջոցառումներին հյուրեր կլինեն մարզերից, նաեւ Արցախից, ինչը շատ ուրախալի է: Ելույթ են ունենալու բավականին մեծ թվով սիրելի երաժիշտներ: Հանրապետության հրապարակում կլինեն նաեւ թատերական ներկայացումներ, արվեստի տարբեր ոլորտներին վերաբերող տաղավարներ»,-ասաց նախարարը:
