Մենք պատրաստ են բանավեճի թե՛ միասին, թե՛ առանձին թեկնածուների հետ, մենք ընդունում ենք այդ հայտը։ Այս մասին այսօր՝ սեպտեմբերի 18-ին հրավիրված մամուլի ասուլիսին հայտարարեց ՀՀ արդարադատության նախարար, Երեւանի ավագանու ընտրություններին «Լույս» դաշինքի քաղաքապետի թեկնածու Արտակ Զեյնալյանը։
«Մենք պատրաստ ենք բանավիճել տետ–ա–տետ, լրագրողի միջնորդությամբ, ցանկացած ձեւաչափով պատրաստ ենք բանավեճի թեկնածուների հետ»,–նշեց նա։
Քաղաքապետի թեկնածուն, այնուամենայնիվ, շեշտեց՝ եթե «լինեն թեկնածուներ, որոնք կխուսափեն բանավեճից, մենք իրենց վատ դրության մեջ չենք դնելու, չենք օգտագործելու որպես հակաքարոզչություն, առավելության հասնելու միջոց»։
Հարցին՝ ինչո՞ւ պետք է երեւանցին ընտրի Արտակ Զեյնալյանին, նա կատակեց. «Բա ո՞ւմ ընտրի»։
Ապա Զեյնալյանը հավելեց, որ իրենք առաջարկում են կառավարման տարբերվող ձեւ, որով մի քանի տասնամյակ հետո կարելի է հասնել երանելի վիճակի։
Հիշեցնենք, որ ավելի վաղ «Բարգավաճ Հայաստան» կուսակցության քաղաքապետի թեկնածու Նաիրա Զոհրաբյանը «Իմ քայլը» դաշինքի քաղաքապետի թեկնածու Հայկ Մարությանին հրավիրեց բանավեճի առանց ՀՀ վարչապետ Նիկոլ Փաշինյանի, որին Մարությանը պատասխանել է, որ կբանավիճի բոլոր թեկնածուների հետ միասին, ոչ մեկին առավելություն չտալով: