Երեւանի ավագանու ընտրությունները չափազանց քաղաքականացված են։ Այս մասին այսօր՝ սեպտեմբերի 18-ին հրավիրված մամուլի ասուլիսին հայտարարեց Կովկասի ինստիտուտի տնօրեն, քաղաքագետ Ալեքսանդր Իսկանդարյանը։
Նրա խոսքով՝ Երեւանի ավագանու ընտրությունները բավականին հետաքրքիր են։ Մի կողմից՝ «Իմ քայլը» դաշինքը չունի հատուկ պատճառ իր հաղթանակի հարցում կասկածելու համար, ինչի մասին են վկայում սոցհարցումների արդյունքները։ Բացի այդ, փորձագետի կարծիքով, էյֆորիան դեռեւս չի անցել. «Այսպիսի պայմաններում կարելի է մտածել, որ նախընտրական քարոզարշավը հանգիստ կլինի, սակայն այն չափազանց քաղաքականացված է։ Կոշտ հռետորաբանություն եւ կոշտ դիմակայություն է առկա»,–նշեց Իսկանդարյանը։
Նա ուշադրություն դարձրեց այն հանգամանքին, որ արտաքին պատճառների բացակայության պայմաններում առանձին դաշինքներ հայտարարվում են թշնամիներ. «Իշխանությունը զգում է, որ ունի էլեկտորալ ռեսուրս»։
Փորձագետը չի բացառել հավանականությունը, որ արտահերթ խորհրդարանական ընտրությունները հաջորդ տարվա գարնանը անցկացնելու պարագայում գործող իշխանությունը մեծամասնությունը ստանալու շանս կստանա։
Մեկնաբանելով «Ելք» դաշինքի ներսում առաջացած ճեղքը՝ նա նկատել է, որ դաշինքը մեկանգամյա մեխանիզմ է խորհրդարանում ձայներ հավաքելու համար. ««Ելք»–ը երբեք առանձնապես միասնություն չի դրսեւորել։ Բացի այդ, հնարավոր չէ գալ իշխանության եւ չվիճել։ Հեղափոխությունը խժռում է իր զավակներին։ Մեր դեպքում դա արագ է զարգանում»,–ասաց նա՝ հավելելով, որ ավագանու ընտրություններից հետո փոփոխություններ կարող են լինել կոալիցիայի ու կաբինետի հարցում։