Զալցբուրգում ԵՄ ոչ պաշտոնական գագաթնաժողովից առաջ Մեծ Բրիտանիայի վարչապետ Թերեզա Մեյը եվրոպացիներին կոչ է արել Brexit-ի հարցով բանակցություններում զիջումների գնալ: «Երբ Մեծ Բրիտանիան իր դիրքորոշումը կատարելագործեց, լավ արդյունք ստանալու համար Եվրամիությունը դրանից հետո պետք է նույնն անի»,- նշել է նա Die Welt պարբերականում հրապարակված հոդվածում, փոխանցում է DW-ն:
Նա շեշտել է, որ ազատ առեւտրի ստեղծման բանակցություններում Բրյուսելն ու ԵՄ անդամները պետք է Լոնդոնին այնպես վերաբերվեն, ինչպես երրորդ երկրներին:
Մեյն իր հոդվածում հանդես է եկել սեփական առաջարկի պաշտպանությամբ այն մասին, որ ԵՄ-ի եւ Մեծ Բրիտանիայի միջեւ ապագա ազատ առեւտրի գոտին տարածվի միայն ապրանքների վրա, այլ ոչ թե նաեւ ծառայությունների: «Այս հարցում ԵՄ առարկությունները չեն համապատասխանում առեւտրի մասին այլ բանակցությունների իրողություններին»,- կարծում է նա:
Մեյը փորձել է հերքել Եվրամիության այն փաստարկը, որ իր երկիրը, պնդելով ծառայությունների անկախ հատվածի մասին, փորձում է խափանել մրցակցությունը: Ներկայիս ծրագրերի համաձայն՝ ԵՄ տարածքում ծառայություններ մատուցելիս բրիտանական ընկերությունները պետք է հետեւեն նույն հրահանգներին, ինչ եւ եվրոպական ընկերությունները:
Բրիտանացի վարչապետը հաստատել է, որ բացասական վերաբերմունք կա Հյուսիսային Իռլանդիայի եւ Բրիտանիայի մնացյալ հատվածի միջեւ մաքսային սահմանի տեղակայման հանդեպ: «Ոչ մի պետություն չի կարող պահանջել մաքսային սահման տեղակայել Միացյալ Թագավորության հատվածների միջեւ, սրան չէր համաձայնի համանման վիճակում հայտնված եւ ոչ մի այլ երկիր»,- նշել է Թերեզա Մեյը:
