Facebook-ը փորձնական ռեժիմով հավելված է թողարկել, որն օգտատերերի համար հեշտացնում է վիրտուալ շփումը, այդ թվում հետագա հանդիպումների նպատակով, գրում է ՏԱՍՍ-ը՝ վկայակոչելով The Verge-ին:
Հրապարակման մեջ նշվում է, որ ծառայությունը փորձարկում են Կոլումբիայում, ներկայումս այն լիովին ինտեգրված է Facebook-ի բջջային հավելվածում եւ դեռ հասանելի չէ համակարգիչներում: Դրանից կարող են օգտվել 18 եւ ավելի բարձր տարիքի մարդիկ: Տվյալ պահին հավելվածն անվճար է, այն չունի գովազդ, լրացուցիչ ծառայությունների համար վճար նույնպես չի նախատեսվում:
Ծառայությունում գրանցվել ցանկացողները պետք է համառոտ գրեն իրենց մասին, պատասխանեն մի շարք հարցերի եւ նշեն, որոնք են իրենց նպատակները: Նրանք պետք է նշեն իրենց գտնվելու վայրը, որը ստուգվելու է GPS համակարգով, թեկնածուներին կարելի է գտնել 100 կմ տիրույթում: iOS օպերացիոն համակարգով աշխատող հեռախոսների սեփականատերերը կարող են ներբեռնել մինչեւ 9 լուսանկար, Android-ի օգտատերերը՝ 12 լուսանկար: Դրանք կարելի է տեղադրել Facebook-ից կամ Instagram-ից, ինչպես նաեւ ներբեռնել հեռախոսի նկարների ալբոմից: