Եթե լինի որեւէ ապացույց ոստիկանության գործողությունների ապօրինության, դա կքննարկվի, բայց ես կարծում եմ, որ ոստիկանության գործողությունները եղել են օրենքով սահմանված կարգով: Այս մասին, այսօր՝ սեպտեմբերի 23-ին, Երեւանի թիվ 133 մանկապարտեզում տեղակայված 8/16 ընտրատեղամասում քվեարկության մասնակցելուց առաջ լրագրողների հետ զրույցում նշեց ՀՀ վարչապետ Նիկոլ Փաշինյանը՝ անդրադառնալով նախօրեին ԲՀԿ Աջափնյակի գրասենյակում տեղի ունեցած խուզարկությանը:

Ինչ վերաբերում է ԲՀԿ քաղաքապետի թեկնածու Նաիրա Զոհրաբյանի հայտարարությանը, թե պետք է պատժվեժն ԲՀԿ-ում ընտրակաշառք բաժանելու մասին սուտ մատնություն կատարողները, եւ արդյո՞ք ընտրություններից հետո պետք է մոռանալ այս լարվածությունը եւ սկսել նոր էջից, Նիկոլ Փաշինյանն արձագանքեց. «Ոչինչ չպետք է մոռանալ»:

NEWS.am-ի հարցին, թե ում նկատի ուներ վարչապետը, եր հայտարարում էր, թե որոշ ուժեր դեմ են խորհրդարանական ընտրություններին եւ «քուչեքում պայմանավորվում են ՀՀԿ-ի հետ», Փաշինյանը պատասխաբեց. «Ովքեր ասում էին, որ իրենք դեմ կլինեն խորհրդարանական ընտրություններին, կամ կարող է դեմ լինեն, կամ երեւի դեմ լինեն, կամ եթե էսպես լինի, դեմ կլինեն, իրենք էին իրենց հայտարարություններն արել»:

Նշենք, որ Փաշինյանը հետաձգել է իր այցը Միացյալ Նահանգներ, որ կարողանա մասնակցել Երեւանի ավագանու ընտրությունների: Նա այսօր աշխատանքային այցով կմեկնի ԱՄՆ՝ մասնակցելու ՄԱԿ-ի Գլխավոր ասամբլեայի 73-րդ նստաշրջանի աշխատանքներին, որտեղ հանդես կգա ելույթով: Նա կհանդիպի նաեւ ՄԱԿ-ի գլխավոր քարտուղար Անտոնիո Գուտերեշի հետ:

Հիշեցնենք, որ Երեւանի ավագանու արտահերթ ընտրությունները մեկնարկել են այսօր՝ սեպտեմբերի 23-ին, առավոտյան ժամը 08.00-ին, եւ կտեւեն մինչեւ երեկոյան 20.00-ն: Երեւանի ավագանու ընտրություններին մասնակցում է 12 քաղաքական կուսակցություն ու դաշինք:

Խուզարկել են ԲՀԿ աջափնյակի գրասենյակը. Նաիրա Զոհրաբյանը պահանջում է Օսիպյանի հրաժարականը (վիդեո)