Ես քվեարկել եմ երեւանցիների եւ ապագա կանաչ ու բարեկարգ քաղաքի համար, հանուն մեր երեխաների եւ մեր ապագայի: Այս մասին սեպտեմբերի 23-ին թիվ 9/59 ընտրական տեղամասում քվեարկելուց հետո ասաց «Երեւանյան միություն» նախաձեռնությունից առաջադրված Երեւանի քաղաքապետի թեկնածու Անահիտ Թարխանյանը:
Թարխանյանը հավելեց, որ քվեարկել է այն բանի օգտին, որ մայրաքաղաքի բնակիչների ապագան այնպիսին լինի, ինչպիսին իրենք այն պատկերացնում են:
«Ինձ թվում է՝ ներկայիս ընտրությունները շրջադարձային կդառնան ամբողջ հասարակության համար: Ես այս ընտրությունների հետ մեծ հույսեր եմ կապում, եւ անկախ այն հանգամանքից, թե ինչպես կանցնեն, համոզված եմ, որ երեւանյան համայնքը եւ մեր դաշինքը մեծ գործընթացներ են ակնկալում, որոնք բոլորս պարտավոր ենք իրականացնել հանուն մեր երեխաների ապագայի»,- ասաց Թարխանյանը:
Հիշեցնենք, որ Երեւանի ավագանու արտահերթ ընտրությունները մեկնարկել են այսօր՝ սեպտեմբերի 23-ին, առավոտյան ժամը 08.00-ին, եւ կտեւեն մինչեւ երեկոյան 20.00-ն: Երեւանի ավագանու ընտրություններին մասնակցում է 12 քաղաքական կուսակցություն ու դաշինք, որոնց ընթացքում երեւանցիները կընտրեն մայրաքաղաքի ապագա քաղաքապետին:
