Ծաղկաձորում սեպտեմբերի 22-ին տեղի ունեցավ «Հայաստանի էլեկտրական ցանցեր» եւ «Արցախէներգո» ընկերությունների երկրորդ համատեղ սպարտակիադիան, որը նվիրված էր Հայաստանի եւ Արցախի անկախության տոներին (ֆոտոռեպորտաժ):
15 տարի անընդմեջ անցկացվող եւ արդեն ավանդական դարձած ՀԷՑ-ի սպարտակիադիան մեկ հարկի տակ էր հավաքել առաջին մեծության սպորտային աստղերի, տարբեր մարզաձեւերի ֆեդերացիաների նախագահների եւ ոլորտի ներկայացուցիչների: Ներկա էին, մասնավորապես, ՀՀ սպորտի եւ երիտասարդության հարցերի նախարար Լեւոն Վահրադյանը, ըմբշամարտի աշխարհի չեմպիոն Վաղինակ Գալուստյանը, գրոսմայստեր Ռաֆայել Վահանյանը, Հայաստանի շախմատի ակադեմիայի հիմնադիր-տնօրեն Սմբատ Լպուտյանը, հայկական ֆուտբոլի լեգենդ, օլիմպիական խաղերի բրոնզե մեդալակիր Խորեն Հովհաննիսյանը, Սիդնեյ-2000 Ամառային օլիմպիական խաղերի եւ 2005 թվականի Եվրոպայի առաջնության բրոնզե մեդալակիր, ծանրամարտիկ Արսեն Մելիքյանը, բազկամարտի աշխարհի չեմպիոն Արման Փիլոյանը, Սեղանի թենիսի ֆեդերացիայի նախագահ, Եվրոպայի չեմպիոն Ֆելիքս Սարգսյանը եւ այլք:
Սպարտակիադիայի շրջանակում երկու կազմակերպությունների գլխամասերի եւ մասնաճյուղերի աշխատակիցներն իրենց ուժերը փորձեցին շախմատի, վոլեյբոլի, նարդիի, սեղանի թենիսի, դարթսի, բադմինտոնի կանանց մրցաշարի, բիլիարդի եւ բազկամարտի մարզաձեւերում: Առաջատար տեղերը զբաղեցրին այն թիմերը, որոնց մասնակիցները տարբեր մարզաձեւերում զբաղեցրին առաջատար դիրքեր եւ ամենաշատ թիմային միավորները հավաքեցին:
Այսպես՝ թիմային արդյունքներով սպարտակիադիայում 4-րդ տեղը զբաղեցրեց ՀԷՑ-ի «Դեբեդ» մասնաճյուղը», 3-րդ տեղը՝ ՀԷՑ-ի «Կենտրոն ՏՀՏ»-ն, 2-րդ տեղը՝ ՀԷՑ-ի «Մուսալեռ» մասնաճյուղը, 1-ին տեղը՝ ՀԷՑ-ի վարչական ապարատը: Ընդհանուր առմամբ, մրցույթներին մասնակցեցին ՀԷՑ եւ «Արցախէներգո» ընկերությունների 400 աշխատակիցներ:
Լրագրողների հետ զրույցում նախարար Լեւոն Վահրադյանը կարեւորեց սպորտի մասսայականացումը՝ որպես դեպի մեծ սպորտ եւ բարձրագույն նվաճումներ տանող ճանապարհ, եւ դրանում մեծ դերակատարություն ունեցող եւ կորպորատիվ մշակույթ դարձած սպորտային միջոցառումները:
Նրա խոսքով՝ մինչեւ նախարարի պաշտոնը զբաղեցնելն անընդմեջ մասնակցել է ՀԷՑ-ի կողմից կազմակերպվող սպատակիադիաներին եւ ամեն անգամ դրական լիցքեր ստացել այստեղ տիրող մթնոլորտից:
«Պետությունը ողջունում է սպորտի մասսայականացումը, որը նպաստում է նաեւ սպորտային տուրիզմի զարգացմանը, քանի որ հիասքանչ Ծաղկաձորում ազատ հյուրանոցներ քիչ են: Նախարարությունը ողջունում է յուրաքանչյուր ձեւաչափ, որը նպաստում է սպորտի մասսայականացմանը, թեկուզ՝ կորպորատիվ տեսակը: Թող այս, չակերտավոր ասած, վարակով վարակվեն մնացած ընկերությունները: Բնականաբար՝ նախարարությունը չի կարող այս մասսայական միջոցառումից անմասն մնալ՝ ցուցաբերելով աջակցություն ֆեդերացիաների միջոցով, մարզչական, մրցավարական, մեթոդական, գույքային առումով»,- ասաց նախարարը:
Նրա խոսքով՝ կորպորատիվ սպորտային մշակույթի եւ նմանատիպ միջոցառումների տարածումը հայկական ընկերություններում մշտական գործողություն է:
«Մենք միշտ հորդորում ենք, որ կազմակերպությունները՝ թե՛ մեծ, թե՛ փոքր, սպորտին ավելի մեծ ուշադրություն դարձնեն, քանի որ մարմնակրթությունը յուրաքանչյուրիս անհրաժեշտ է աշխատանքում. եթե մարմինը պատրաստ չէ աշխատանքային ծավալին, միանշանակ աշխատանքում կթերանաս»,- ասաց Լեւոն Վահրադյանը:
Նա հավելեց, որ նախարարության մասսայական սպորտի վարչությունն անցած տարվանից այլ ընկերությունների է հրավիրում՝ սպորտային միջոցառումներ անցկացնելու համար, եւ 2-3 խոշոր կազմակերպություններ համաձայնել են 2009 թվականից համագործակցել գերատեսչության հետ: «Գնդակը, այսպես ասած, իրենց դաշտում է»,- եզրափակեց նախարարը:
«Հայաստանի էլեկտրական ցանցեր» ՓԲԸ ընկերության գլխավոր տնօրեն Կարեն Հարությունյանն իր հերթին նշեց, որ սպարտակիադիան լավագույն շփման միջոցն է ՀԷՑ եւ «Արցախէներգո» ընկերությունների՝ տարբեր շրջաններում գտնվող մասնաճյուղերի աշխատակիցների համար, քանի որ առիթ է ընձեռում Արցախի եւ Հայաստանի տարբեր շրջաններից մարդկանց ծանոթանալ, շփվել եւ միմյանց հետ մրցել:
«Դա ավելացնում է կոլեկտիվի ներուժը, բացի այդ՝ մի քանի գեղեցիկ օր է պարգեւում»,- ասաց ընկերության գլխավոր տնօրենը:
«Նման միջոցառումները նպաստում են երկու կառույցների միջեւ համագործակցությանը: Սա եւս մի հարթակ է՝ ճանաչելու մեկս մյուսին, ձեւավորելու ավելի լուրջ ընկերական եւ գործընկերային հարաբերություններ»,- իր հերթին նշեց «Արցախէներգո» ՓԲԸ գլխավոր տնօրեն Անդրանիկ Խաչատրյանը՝ հավելելով, որ իր ղեկավարած ընկերության աշխատակիցները, 2017 թվականին առաջին անգամ մասնակցելով սպարտակիադիային, ավելի են ձգտում ներգրավվել սպորտային մրցույթներում:
ՀԷՑ-ի արհեստակցական կազմակերպության նախագահ Արտեմ Մուրադյանն էլ պատմեց, որ ընկերությունը նմանատիպ միջոցառումների կազմակերպման 15 տարվա փորձ ունի. սկսել են շախմատից, հետո մրցույթները տարեցտարի համալրել նոր սպորտաձեւերով:
«Այս տարի առաջին անգամ անցկացվեց ինտելեկտուալ մրցաշարի փառատոն, որը տեղի ունեցավ սեպտեմբերի 14-16-ն Արցախում: Դրան մասնակցում էին 3-ական թիմեր ՀԷՑ-ից եւ «Արցախէներգո»-ից: 1-ին տեղը գրավել էր ՀԷՑ-ի «Ղարս» մասնաճյուղը (Գյումրի), 2-րդ տեղը՝ ՀԷՑ-ի «Կենտրոն ՏՀՏ»-ն, 3-րդ տեղը՝ «Արցախէներգո»-ի 1-ին գլխամասի թիմը, 4-րդ տեղը՝ ՀԷՑ-ի «Դեբեդ» մասնաճյուղը (Վանաձոր)»,- ասաց Արտեմ Մուրադյանը:
Նա նշեց, որ հաջորդ տարի, աշխատակիցների խնդրանքով, սպարտակիադիան համալրվելու է նաեւ բադմինտոնի զուգախաղով, որը մինչ այժմ անցկացվում էր միայն կանանց համար:
Աշխատակիցները նաեւ խնդրում են վերսկսել մինի-ֆուտբոլի առաջնությունը. ընկերությունն ուներ մինի-ֆուտբոլի լավ թիմ, որը մի քանի անգամ էներգետիկների միջազգային մրցաշարերում հաղթող է ճանաչվել: Մրցույթը նախ կանցկացվի մասնաճյուղերի, ապա՝ էներգահամակարգի մյուս կազմակերպությունների միջեւ:
«Երկու կոլեկտիվների միջեւ հաղթողներ եւ պարտվողներ չկան. հաղթում ենք բոլորս, քանի որ մարդիկ տասնամյակներ աշխատելով մի ընկերությունում՝ իրար չէին ճանաչում: Շատ հաճելի է, որ այստեղ նրանք շփվում են, փորձի փոխանակում իրականացնում: Սա կոլեկտիվի համար այնպիսի մերձեցում է, որ ամբողջ տարվա ընթացքում լիցք է հաղորդում՝ լավ աշխատելու համար: Ուրախալի է, որ մրցաշարերում տարեցտարի ավելանում է երիտասարդ մասնակիցների թիվը»,- ասաց Արտեմ Մուրադյանը:
