Ուրախ եմ, որ առնվազն քվեարկել երեւույթը սովորեցինք եւ այժմ կարող ենք վստահ լինել, որ գրանցված քվեներն իրական քվեներ են։ Այս մասին այսօր՝ սեպտեմբերի 25-ին լրագրողների հետ հանդիպմանն ասաց ՀՀ նախագահի խորհրդական, քաղաքագետ Թեւան Պողոսյանը:
Նա հույս հայտնեց, որ «Իմ քայլը» դաշինքը հաշվի կառնի իր օգտին ստացած մեծ թվով քվեները, դասեր կքաղի նախկինում նմանատիպ իրավիճակներից սխալներ թույլ չտալու համար, ինչպես նաեւ կապացուցի, որ նոր Հայաստանում սերն ու հանդուրժողականությունը կարեւոր արժեքներ են, ընտրություններին մասնակցած մյուս ուժերի լավ գաղափարները հաշվի կառնվի՝ ապացուցելով, որ Երեւանը բոլորինն է: «Կարծում եմ՝ Հայկը կկարողանա ճիշտ ուղիներ գտնել, իսկ մեր պարտականությունն է՝ իրեն ու թիմին հայտնենք փոքր խնդիրների մասին»,–նշեց նա:
Թեւան Պողոսյանը հարցին, արդյոք վտանգավոր չէ՞ նման քանակի քվեները, նկատեց. «Բնական է, որ մոտ այդ թիվը մեծ վտանգ ունի: 1991թվականը հիշենք եւ նայենք, թե դրանից հետո Հայաստանն ինչպես է զարգացել, ունենք օրինակը՝ ինչից դասեր քաղել: Հարց է առաջանում՝ դասեր քաղե՞լ ենք, թե՞ ոչ: Խելոքն ուրիշների սխալների վրա է սովորում, ոչ խելոքը՝ սեփական։ Մաղթում եմ՝ խելոք լինենք»։
Ավելի վաղ NEWS.am-ը հայտնել էր, որ սեպտեմբերի 23-ին կայացած Երեւանի ավագանու ընտրություններում նախնական տվյալներով «Իմ քայլը» դաշինքը ստացել է 81,06 տոկոս, ԲՀԿ-ն՝ 6,95 տոկոս, «Լույս» դաշինքը՝ 4,99 տոկոս:
Նշենք, որ այս տվյալների համաձայն, Երեւանի ավագանու 65 տեղերից 57-ը բաժին կհասնի «Իմ քայլը» դաշինքին, 5 տեղ կստանա ԲՀԿ-ն եւ 3 տեղ՝ «Լույս» դաշինքը: Մյուս ուժերը ավագանիում ներկայացված չեն լինի: